Yevropa va Dubay shokoladlarida xavfli moddalar aniqlandi

Deutsche Welle nashrining xabar berishicha, o‘tkazilgan tadqiqot davomida Yevropa va Dubayda ishlab chiqarilgan olti turdagi shokolad tahlil qilindi. Natijalar shok holatiga soldi: ularning tarkibida nafaqat past sifatli, balki inson sog‘lig‘i uchun xavfli moddalar ham aniqlandi.

Tadqiqot va tekshiruv natijalari

Tadqiqot davomida mutaxassislar 7 yevrodan 25 yevrogacha bo‘lgan shokoladlarni laboratoriyada o‘rganib chiqishdi. Namunalar ikki xil manbadan keltirilgan:

- Dubaydan – 2 ta shokolad;
- Turkiyadan – 1 ta shokolad;
- Niderlandiyadan – 1 ta shokolad;
- Germaniyadan – 2 ta shokolad.

Tekshiruv natijalari 18 mart kuni e’lon qilindi va bir qator xavotirli faktlarni ochiqladi.

Kanserogenlar va zamburug‘ izlari

Tahlillar davomida Dubayda ishlab chiqarilgan shokoladlarda xavfli moddalar – 3-monoklorpropandiol va glitsidil efirlari aniqlandi. Bu moddalar rafinatsiya qilingan palma moyi tarkibida uchrab, kanserogen deb hisoblanadi.

Shuningdek, pistadan tayyorlangan bir shokolad namunasida aflatoksinlar – mog‘or zamburug‘idan paydo bo‘ladigan moddalar aniqlandi. Mutaxassislar bu moddalar jiddiy xavf tug‘dirmasligini aytishsa-da, ular sifatli shokolad tarkibida bo‘lishi mumkin emasligini ta’kidlashgan.

Tarkib va aniqlangan kamchiliklar

Dubay uslubidagi shokoladlardan biri xavfli moddalarni o‘z ichiga olmagan bo‘lsa-da, ular gastronomik jihatdan hech qanday o‘ziga xoslikka ega emas. Faqat bitta – BAAda ishlab chiqarilgan shokoladda pistaning aniq ta’mi sezilgan. Qolgan shokoladlarda esa oddiy yong‘oqli ta’m ustunlik qilgan.

Shuningdek, shokolad tarkibi asosan shakar va o‘simlik moyidan iborat bo‘lib, ba’zi mahsulotlarda aromatizatorlar va rang beruvchi moddalar ham mavjud. Bu holat shokoladni yuqori sifatli mahsulot deb atash imkonini bermaydi.

Mutaxassislar yorliq va ogohlantirish ma’lumotlari bilan bog‘liq jiddiy kamchiliklarni ham aniqladi. To‘rtta holatda mahsulot tarkibi va allergenlar haqidagi ma’lumotlar umuman ko‘rsatilmagan.

«Dubay shokoladi» shov-shuvi asossizmi?

Tekshiruvchilar xulosasiga ko‘ra, «Dubay shokoladi» haqidagi ajoyib tavsiflar asossiz. Mutaxassislar klassik pistali shokoladni bu shirinlikka arzon va xavfsizroq muqobil sifatida tavsiya etishmoqda.

Agar iste’molchilar aynan Dubaycha uslubdagi shirinlik istashsa, mutaxassislar uni uy sharoitida tayyorlashni tavsiya qilishmoqda. Internetda ushbu retseptlar ko‘p uchraydi. Kerak bo‘ladigan masalliklar quyidagilar:

- Shokolad,
- «Farishta sochi» (sharq shirinliklari do‘konlarida sotiladi),
- O‘simlik moyi,
- Kunjut pastasi,
- Pista kremi.

Olib borilgan tadqiqotlar shunday xulosaga kelmoqda: ba’zi shokoladlar nafaqat sifatsiz, balki sog‘liqqa xavfli. Shu bois iste’molchilarga shokolad tanlashda ehtiyotkorlik bilan yondoshish, tarkib etiketkasini diqqat bilan o‘qish tavsiya qilinadi. Dubay shokoladi haqidagi ajoyib ta’riflar va baland narx har doim ham sifat kafolati emas. “Zamin” yangiliklarini “Telegram”da kuzatib boring