AQSHda bir nechta xavfsizlik amaldori lavozimidan olindi

AQSh Milliy xavfsizlik kengashining bir nechta yuqori martabali amaldori 3 aprel kuni egallab turgan lavozimlaridan ozod etildi, deb Reuters xabar berdi.

“Vaziyatdan xabardor uch kishining so‘zlariga ko‘ra, payshanba kuni ertalab Oq uy huzuridagi Milliy xavfsizlik kengashining bir nechta direktori lavozimidan bo‘shatilgan”, — deyiladi xabarda.

Manbalar ishdan bo‘shatish sababi haqida aniq ma’lumot bermagan, biroq ikki suhbatdosh bu holatni amaldorlarga nisbatan o‘tkazilgan tekshiruv natijalari bilan bog‘lagan. Ma’lumotlarga ko‘ra, ishdan ketganlar orasida texnologiya va milliy xavfsizlik bo‘yicha katta direktor David Fayt ham bor.

So‘nggi haftalarda Donald Tramp jamoasi faoliyati bilan bog‘liq bir necha mojarolar yuzaga keldi. Jumladan, AQSh prezidentining milliy xavfsizlik bo‘yicha maslahatchisi Mayk Volts ikki bor shubhali vaziyatlarda tilga olindi. Avvaliga u Yamandagi husiylarga qarshi zarbalar haqidagi maxfiy ma’lumotlar tarqalishida tilga olindi. Keyinchalik uning yordamchilari harbiy masalalarni shaxsiy Gmail orqali muhokama qilgani oshkor bo‘ldi.

Shundan so‘ng OAVda tarqalgan xabarlarga ko‘ra, ma’muriyatdagi ayrim shaxslar Mayk Voltsning iste’fosini talab qilmoqda. “Zamin” yangiliklarini “Telegram”da kuzatib boring