280
Estoniya harbiy-dengiz kuchlari xalqaro qonunlarni buzgan, bayroqsiz suzgan tankerga Boltiq dengizida to‘xtatish chorasi ko‘rdi. Bu haqda bosh vazir Kristen Mixal ijtimoiy tarmoqdagi sahifasida ma’lum qildi.
“Bugun ertalab flot hech bir davlat bayrog‘isiz harakatlanayotgan va sanksiyaga tushgan kemani to‘xtatdi. Hozirda uning huquqiy maqomi va xavfsizlik holati tekshirilmoqda,” — deb yozdi u.
Bu kema qayerga ketayotgan edi?
Estoniya OAV xabariga ko‘ra, tanker Rossiyaning Ust-Luga neft portiga yo‘l olayotgan edi. Ilgari Jibutida ro‘yxatdan o‘tgan, ammo hozir hech qanday davlat bayrog‘isiz harakatlangan.
Bu holat xalqaro dengiz qonunlariga ko‘ra ochiq qonunbuzarlik hisoblanadi.
Amaliyotga vertolyotlar ham jalb etilgan. Kema Tallin qo‘ltig‘i yaqinida to‘xtatilgan.
Rossiyaning “soya floti” nima?
G‘arb davlatlariga ko‘ra, Rossiya Boltiq dengizida yuzlab bayroqsiz, hujjatsiz tankerlardan iborat “soya floti”ni boshqaradi.
Bu flot orqali neft va gaz mahsulotlari sanksiyalarni chetlab o‘tgan holda eksport qilinadi.
Estoniya chegara xizmati vakili Veyko Kommusaar:
“So‘nggi bir yil ichida Fin qo‘ltig‘ida ko‘plab hujjatsiz kemalar paydo bo‘ldi. Bu, aniqki, Rossiyaning soya flotiga tegishli.”
Harbiy kuch ishlatishga ruxsat berildi
Estoniya parlamenti shu haftada harbiy-dengiz kuchlariga tijorat kemalariga nisbatan kuch ishlatish imkonini beruvchi qonunni qabul qildi.
Bu chora dengiz tubidagi strategik infratuzilma — elektr liniyalari, aloqa tarmoqlari va energiya manbalarini himoya qilishga qaratilgan.
Eslatib o‘tamiz, 2023 yil dekabrida Finlyandiya ham shunday bayroqsiz tankerga qarshi choralar ko‘rgan edi. U Estoniya–Finlyandiya suvosti elektr liniyasiga zarar yetkazganlikda gumon qilingan.
Siz nima deb o‘ylaysiz — xalqaro qonunlarni buzgan kemalarga nisbatan harbiy kuch ishlatish qanchalik asosli va xavfsiz yechim?
12:20, 3-04-2025
