Keniyada 5 mingta chumoli bilan qo‘lga tushgan yoshlar hibsda

^{Foto: Reuters}
Keniyaning Nakuru okrugida Belgiya fuqarosi bo‘lgan ikki yosh yigit tabiat boyliklarini noqonuniy tashishda gumonlanib hibsga olindi, deb Euronews ma’lum qildi.

Huquqni muhofaza qiluvchi organlar ularning yonidan kichik probirkalarga joylangan 5 mingta chumoli topishdi. Yigitlar ushbu hasharotlarni ermak uchun yig‘ishganini va bu ish qonunga zid ekanini bilmaganini aytgan. Ular Nayrobidagi sudga olib borildi.

Shu paytda sud zalining o‘zida yana ikki kishi — Keniya va Vetnam fuqarolari ham chumoli kontrabandasida ayblanib, ish qo‘zg‘atildi.

Keniya Yovvoyi tabiatni muhofaza qilish xizmati (KWS) ma’lumotlariga ko‘ra, ushbu shaxslar Osiyo va Yevropadagi yashirin bozorlar uchun hasharotlarni noqonuniy eksport qilish bilan shug‘ullangan.

"Chumolilarni qonuniysiz eksport qilish — nafaqat Keniyaning biologik turlilik borasidagi huquqlariga putur yetkazadi, balki mahalliy jamoalar va ilmiy muassasalarning muhim ekologik va iqtisodiy manfaatlarini ham yo‘qqa chiqaradi", — deyiladi KWS bayonotida.

Ma’lumki, Keniya ilgari asosan fil, karkidon, pangolin kabi yirik hayvonlar savdosiga qarshi kurash olib borgan. Ammo so‘nggi vaqtda noqonuniy savdo e’tiborni kichik, ammo tabiat uchun muhim bo‘lgan turlarga qaratayotgani kuzatilmoqda.

Qo‘lga olingan chumolilar taxminan 7 ming yevroga baholangan. Bu narx hasharot turiga va jahon bozoridagi talabga qarab o‘zgarishi mumkin.

Afrika yovvoyi tabiati fondining vitse-prezidenti Filip Muruti shunday deydi: "Chumolilar tuproqni boyitadi, urug‘larni tarqatadi, qushlarni oziq bilan ta’minlaydi. Agar ularga talab bo‘lsa, savdosi qonuniy tartibga solinishi shart. Bizning tabiiy resurslarimiz shunchaki tortib olinishi mumkin emas."

Barcha ayblangan to‘rt nafar shaxs 23 aprelgacha hibsda qoladi. O‘sha kuni navbatdagi sud majlisi bo‘lib o‘tadi.

Siz nima deb o‘ylaysiz: tabiat boyliklarini himoya qilishda yangi yondashuvlar kerakmi? “Zamin”ni Telegramʻda oʻqing!