Xitoy Xalq Respublikasining Tyanszin shahri bu yilgi Shanxay Hamkorlik Tashkiloti sammitiga mezbonlik qilmoqda. Rasmiy ma’lumotlarga ko‘ra, sammit doirasida 20 dan ziyod davlat va hukumat rahbarlari, shuningdek, 10 ta xalqaro va mintaqaviy tashkilot yetakchilari ishtirok etishi kutilmoqda. Bu haqda XXR tashqi ishlar vaziri yordamchisi Lyu Bin maxsus matbuot anjumanida ma’lum qildi.
Sammit nafaqat siyosiy muloqot va hamkorlik uchun muhim minbar sifatida, balki xalqaro munosabatlar yo‘nalishida yangi yo‘nalishlar va kelishuvlarni muhokama qilish uchun katta imkoniyat sifatida baholanmoqda. SHHT doirasida xavfsizlik, iqtisodiy hamkorlik va madaniy almashinuv masalalari yana bir bor kun tartibiga chiqishi kutilayapti.
Ta’kidlanishicha, sammitda ishtirok etishi rejalashtirilgan nufuzli rahbarlar ro‘yxati juda keng. Ular orasida:
Rossiya prezidenti Vladimir Putin
Belarus prezidenti Aleksandr Lukashenko
Hindiston bosh vaziri Narendra Modi
Eron prezidenti Mas’ud Pezeshkiyon
Qozog‘iston prezidenti Qasim-Jomart Toqayev
Qirg‘iziston prezidenti Sadir Japarov
Pokiston bosh vaziri Shahboz Sharif
Tojikiston prezidenti Emomali Rahmon
O‘zbekiston prezidenti Shavkat Mirziyoyev
Mongoliya prezidenti Uxnaagiyn Xurelsux
Ozarbayjon prezidenti Ilhom Aliyev
Armaniston bosh vaziri Nikol Pashinyan
Kambodja bosh vaziri Xun Manet
Maldiv prezidenti Muhammad Muizzu
Nepal bosh vaziri Sharma Oli
Turkiya prezidenti Rejep Tayyip Erdog‘an
Misr bosh vaziri Mustafo Madbuli
Turkmaniston prezidenti Serdar Berdimuhamedov
Indoneziya prezidenti Prabovo Subianto
Laos prezidenti Txonglun Sisulit
Malayziya bosh vaziri Anvar Ibrohim
Vetnam bosh vaziri Fam Min Chin
Sammit jarayonida mintaqaviy barqarorlik, iqtisodiy aloqalarni kuchaytirish va strategik sheriklik masalalari asosiy mavzu bo‘lishi kutilmoqda. Mutasaddilarning ta’kidlashicha, bu yig‘ilish xalqaro maydondagi siyosiy vaziyat va geosiyosiy muvozanatga jiddiy ta’sir ko‘rsatishi mumkin.
