Isroil G‘azo sektoriga quruqlikdan hujumni boshladi

16-sentyabr, seshanba kuni Isroil G‘azo shahriga qarshi quruqlikdagi hujumning asosiy bosqichini boshladi, deb Kursiv Media xabar berdi. Bu haqda mamlakat mudofaa vazirligi ma’lum qildi.

Isroil armiyasi (CAXAL)ning bildirishicha, qo‘shinlar shahar markaziga qarab harakatlanmoqda. U yerda taxminan 3 minggacha HAMAS jangarisi borligi aytilmoqda. Mudofaa vaziri Israil Katsga ko‘ra, hujumdan maqsad — HAMASni yo‘q qilish, terror infratuzilmasini barbod etish va garovdagi fuqarolarni ozod etish sharoitini yaratishdir.

G‘azo rasmiylariga ko‘ra, hujumning ilk soatlarida havo zarbalari oqibatida kamida 40 kishi halok bo‘lgan, ularning aksariyati tinch aholi. Tanklar turar joy massivlariga kirib borgan. Isroil yana bir bor fuqarolarni hududni tark etishga chaqirdi.

BMT komissiyasi aynan shu kuni Isroilni G‘azada qirg‘in va unga da’vat qilishda aybladi. G‘azo sog‘liqni saqlash vazirligiga ko‘ra, bir sutkada yana 3 kishi ochlikdan vafot etdi — ulardan biri bola. Ochlikdan o‘lganlar soni jami 428 nafarga yetgan.