Saudiya Arabistoni Haj va Umra vazirligi 2026-yilgi Haj mavsumida yangi talab va qoidalarni amalga kiritdi, deb ma’lum qildi O‘zbekiston musulmonlari idorasi Haj va Umra markazi.
Ma’lumotga ko‘ra, endi har bir ziyoratchiga Haj vizasi faqat “Nusuk” platformasi orqali olingan sog‘lomlik haqidagi rasmiy tibbiy guvohnoma taqdim etilganidan keyingina beriladi.
Bu yangilik Saudiya Sog‘liqni saqlash vazirligi tashabbusi bilan joriy etilgan bo‘lib, uning maqsadi — ziyoratchilarning xavfsizligi va sog‘lig‘i uchun qo‘shimcha kafolat yaratishdir. Endi Haj va Umra safariga mas’ul vazirlik hamda tashkilotlar har bir nomzodni maxsus tibbiy ko‘rikdan o‘tkazishi va uning safarga layoqatini aniqlashi shart bo‘ladi.
Rasmiy ma’lumotda aytilishicha, bu talablar nafaqat kasallik tarqalishining oldini olish, balki ziyorat paytida inson hayotiga xavf tug‘dirishi mumkin bo‘lgan holatlarni bartaraf etishga qaratilgan. Saudiya hukumati bu orqali Haj ziyoratini tashkil etishda yanada tartib-intizom va mas’uliyatni kuchaytirishni maqsad qilgan.
Hujjatda ta’kidlanishicha, tibbiy ko‘rikdan o‘tmagan yoki guvohnoma taqdim etmagan fuqarolarga vizani rasmiylashtirish imkoni berilmaydi. Bu esa avvalgi yillarga nisbatan katta o‘zgarish hisoblanadi, chunki avval tibbiy ma’lumotlar ko‘pincha tavsiya darajasida bo‘lardi.
Ma’lum qilinishicha, ayrim og‘ir kasalliklarga chalingan shaxslarga Haj safariga ruxsat berilmaydi. Ular qatorida buyrak yetishmovchiligi tufayli dializga muhtoj bemorlar, engil harakatda ham nafas qisilishi bilan kechuvchi yurak yetishmovchiligi, o‘pka faoliyatini sustlatuvchi surunkali xastaliklar bor. Shuningdek, jigar sirrozi, og‘ir ruhiy yoki nevrologik buzilishlar, qarilik demensiyasi va homiladorlikning so‘nggi bosqichidagi ayollar ham safarga chiqishi mumkin emas.
Bundan tashqari, yuqumli kasalliklarning faol shakllariga ega bo‘lgan shaxslar, jumladan sil yoki gemorragik isitma kabi kasalliklarga chalinganlar, hamda kimyoterapiya yoki immunitetni susaytiruvchi davolanish jarayonida bo‘lgan onkologik bemorlar ham Haj safaridan chetda qoladi.
Saudiya Haj va Umra vazirligi ta’kidlashicha, agar ushbu talablar buzilsa yoki hujjatlarda yolg‘on ma’lumot berilsa, tegishli choralar ko‘riladi. Bu nafaqat ziyoratchilarning shaxsiy mas’uliyatini oshirish, balki umumiy tartib va xavfsizlikni ta’minlash maqsadida amalga oshirilmoqda.
Mutaxassislar fikricha, yangi tizim nafaqat ziyoratchilar sog‘ligini muhofaza qilishga, balki Haj va Umra safarlari davomida yuqumli kasalliklar tarqalishining oldini olishga xizmat qiladi. Shu tariqa, 2026-yilgi Haj mavsumi yanada tartibli va xavfsiz sharoitda o‘tishi kutilmoqda.
“Zamin”ni Telegramʻda oʻqing!
