Turkiya poytaxti Anqarada joylashgan Etimesgut harbiy aerodromi yaqin orada mamlakat yetakchilari va xorijiy delegatsiyalar uchun mo‘ljallangan maxsus VIP aeroportga aylantirilmoqda, deb xabar berdi Sözcü nashri.
Ma’lumotlarga ko‘ra, aeroportni qayta qurish loyihasi juda keng ko‘lamli bo‘lib, u zamonaviy xalqaro talablarga javob beradigan darajada bo‘ladi. Uchish-qo‘nish yo‘lagi 3000 metrgacha uzaytiriladi, kengligi esa 60 metrga yetkaziladi. Shu bilan birga, bir vaqtning o‘zida 50 ta samolyotni qabul qila oladigan ikki katta perron qurilishi ko‘zda tutilgan.
Aeroport asosan prezidentlar, bosh vazirlar va yuqori darajali mehmonlar tashriflari uchun xizmat qiladi. Bu yerda Faxriylar zali va 2400 kvadrat metrlik Davlat mehmon uyi qurilayotgan bo‘lib, u maxsus rasmiy delegatsiyalar va xalqaro sammitlar uchun mo‘ljallangan.
Obyekt boshqaruvi Turkiya aeroportlari davlat boshqarmasiga topshiriladi, biroq mulk huquqi Bosh shtabda saqlanib qoladi. Qayta qurish ishlari 2026-yil iyul oyiga qadar yakunlanishi rejalashtirilgan. Shu sana Turkiya tarixidagi muhim voqea — Türkkuşu Planör maktabining ochilganiga 100-yil to‘lishiga to‘g‘ri keladi. Ushbu maktab ochilishida o‘tgan asrda Mustafo Kamol Otaturk shaxsan ishtirok etgan edi.
Etimesgut aerodromi tarixan Turkiya harbiy-havo kuchlarining asosiy bazalaridan biri bo‘lgan, shuningdek, o‘quv va logistika markazi vazifasini bajarib kelgan. Endi u deyarli bir asrdan so‘ng yana strategik ahamiyat kasb etayotgani bilan ahamiyatli. Yangi VIP aeroport Turkiya poytaxtining diplomatik va protokol salohiyatini yanada mustahkamlashi, mamlakatni xalqaro miqyosdagi muhim siyosiy markazlardan biriga aylantirishi kutilmoqda.
“Zamin”ni Telegramʻda oʻqing!
