Davosdagi Jahon iqtisodiy forumida o'tgan keskin uchrashuvlar ortidan Ukraina, Rossiya va AQSH ishtirokida uch tomonlama muzokaralar tayyorlanayotgani ma'lum bo'ldi. Uchrashuvlar 23–24 yanvar kunlari Birlashgan Arab Amirliklarida o'tkazilishi rejalashtirilgan. Bu haqda podrobno.uz xabar beradi.
22 yanvar kuni Davosda AQSH va Ukraina prezidentlari Donald Tramp hamda Vladimir Zelenskiy qariyb bir soat muzokara o'tkazdi. Uchrashuv yakunida Tramp suhbatni qisqacha “yaxshi o'tdi” deya baholab, “hamma urush tugashini xohlaydi” dedi va Shveytsariyadan jo'nab ketdi.
Biroq G'arb matbuoti bu muloqotni ehtiyotkorroq talqin qilmoqda. Financial Times yozishicha, Zelenskiy xavfsizlik kafolatlari va urushdan keyingi tiklanish bo'yicha aniq majburiyatlarni rasmiylashtira olmagan. Tramp ma'muriyati bilan oldindan kelishilgan hujjatlar ham imzolanmay qolgan.
Amerikalik hamkasbi bilan uchrashuvdan so'ng Zelenskiy forumda keskin chiqish qilib, Yevropa yetakchilarini ichki kelishmovchiliklar sabab qat'iyatsizlikda aybladi. Unga ko'ra, so'nggi bir yilda vaziyat deyarli o'zgarmagan, Yevropa esa o'zini himoya qilish uchun hanuz yetarli siyosiy irodani namoyon eta olmayapti. Zelenskiy Yevropani “global kuch”ga aylanish o'rniga “go'zal, ammo bo'lingan” davlatlar majmuasi bo'lib qolayotganini ta'kidladi.
U, shuningdek, Tramp ilgari surgan yangi “tinchlik kengashi” tashabbusini ham tanqid qilib, Yevropa bu borada yagona pozitsiya ishlab chiqmaganini aytdi. Zelenskiy fikricha, kengashda manfaatlari keskin farqlanuvchi mamlakatlar bor, frontda esa hatto o't ochishni to'xtatish rejimi ham yo'q.
Zelenskiy yevropaliklarni yanada keskin qadamlar tashlashga chaqirdi: “soya floti” orqali tashilayotgan Rossiya neftini to'xtatish va musodara qilish. Shuningdek, u Erondagi vaziyatni fojeali deya atab, xalqning rejimga qarshi kurashida xalqaro hamjamiyat yetarlicha yordam bermayotganiga e'tibor qaratdi.
Jarayonning navbatdagi bosqichi sifatida BAAda o'tadigan uchrashuvlar Zelenskiy tomonidan “texnik darajadagi” muloqot deb ataldi. Kutilishicha, uch davlat delegatsiyalari ikki kun davomida ehtimoliy murosa tafsilotlarini muhokama qiladi.
Shu bilan birga, ushbu bosqichdan avval AQSH vakillarining Rossiya prezidenti Vladimir Putin bilan to'g'ridan-to'g'ri muzokaralari 22 yanvar kechqurun rejalashtirilgani bildirilgan.
“Zamin”ni Telegramʻda oʻqing!
