Kanada sporti uchun bir paytlar katta umid bo‘lgan, keyin esa butunlay boshqa yo‘lga kirib ketgan ism yana kun tartibiga chiqdi. Sobiq snoubordchi Rayan Jeyms Uedding 22 yanvar kuni kechqurun Meksikada hibsga olindi. Bu haqda AQSH tomonidan, xususan, FQB direktori Kesh Patel ma’lum qildi.
AQSH rasmiylariga ko‘ra, 44 yoshli Uedding “Sinaloa” karteli bilan bog‘liq bo‘lgan va Meksikada o‘n yildan ziyod vaqt yashirinib yurgan. Tergov versiyasiga ko‘ra, u Kolumbiyadan yuzlab kilogramm kokainni Meksika va Janubiy Kaliforniya yo‘nalishi orqali AQSH hamda Kanadaga olib o‘tishga qaratilgan katta tarmoqni boshqargan.
Kesh Patel uni Pablo Eskobar va Xoakin “El Chapo” Gusman kabi mashhur narkobaronlar bilan taqqoslagani ham qayd etildi. Bosh prokuror Pem Bondi esa Uedding AQSHga olib ketilgani va u yerda sud oldida javob berishini bildirgan.
Uedding nomi FQBning “eng ko‘p qidirilayotgan o‘n nafar” ro‘yxatiga 2025 yil mart oyida kiritilgan, uning joylashuvi bo‘yicha aniq ma’lumot bergan shaxsga 15 million dollargacha mukofot belgilangan edi. Bu mukofot miqdori keyinroq rasman oshirilgani haqida FQB o‘z sahifasida ham yozgan.
Sud hujjatlarida keltirilishicha, Ueddingning jinoiy faoliyati 2008 yillar atrofida boshlangan, 2009 yilda u kokain tarqatish bo‘yicha til biriktirganlik uchun aybdor deb topilib, federal qamoq jazosini olgan, 2011 yilda esa ozodlikka chiqqan. Tergov iddaosiga ko‘ra, aynan shundan keyin u “giyohvandlik imperiyasi”ni qurishga kirishgan.
Qizig‘i, bu voqeadan oldin ham Meksikada Ueddingga aloqador deb taxmin qilinayotgan mulklar atrofida katta shov-shuv bo‘lgan: o‘tgan oylarda (rasmiylar ma’lumotiga ko‘ra) qiymati qariyb 40 mln dollarga baholangan o‘nlab mototsikllar musodara qilingani, shuningdek, Mexikoning turli nuqtalaridan Olimpiada medallari va boshqa buyumlar olib qo‘yilgani aytilgan.
Qisqasi, sportdan chiqqan bir insonning bu darajada og‘ir ayblovlar markaziga tushib qolishi — real hayotdagi “film”dek tuyulishi mumkin, lekin bu yerda yumor yo‘q: gap katta jinoiy tarmoq, qurbonlar va xalqaro xavfsizlik haqida ketyapti. Endi asosiy nuqta — AQSHdagi sud jarayonlari: ayblovlar qanchalik isbotlanadi va ish qanday huquqiy yakun topadi — shu savollarga javobni rasmiy tergov va sud beradi.
“Zamin”ni Telegramʻda oʻqing!
