AQSHning shimoli-sharqiy hududlariga kuchli qor bo‘roni yopirilishi oqibatida mamlakat bo‘ylab 2 mingdan ortiq aviareys bekor qilindi, yana kamida 700 ta parvoz kechiktirildi. Bu haqda onlayn kuzatuv xizmati — FlightAware xabar berdi.
Qayd etilishicha, bir kun davomida AQSH ichida, shuningdek mamlakatga kirib kelishi yoki undan chiqishi rejalashtirilgan jami 2 026 ta reys amalga oshirilmay qolgan.
Mamlakat ichki xavfsizlik vaziri — Kristi Noem shimoli-sharqiy shtatlar tomon navbatdagi tabiiy ofat yaqinlashayotgani haqida ogohlantirdi. Uning so‘zlariga ko‘ra, Nyu-Jersidan tortib Janubi-Sharqiy Yangi Angliya hududlarigacha bo‘lgan masofada qor bo‘ronlari, jadal qor yog‘ishi va kuchli shamol kuzatilishi mumkin. Eng katta zarar sohilbo‘yi hududlariga to‘g‘ri kelishi kutilmoqda.
Shuningdek, avval — yanvar oyida ham mamlakatning katta qismi shiddatli qor yog‘ishi ta’siri ostida qolgan edi. Ayniqsa, qish sharoitiga nisbatan kam moslashgan Tennessi, Missisipi hamda Luiziana shtatlarida jiddiy oqibatlar qayd etilgan.
“Zamin”ni Telegramʻda oʻqing!
