Iran International telekanali tarqatgan ma’lumotga ko‘ra, Eron Ekspertlar kengashi halok bo‘lgan Ali Xomanaiyning o‘g‘li Mojtabo Xomanaiyni yangi oliy rahbar etib saylagan. Shu bilan birga, bu xabar hozircha rasmiy manbalar tomonidan tasdiqlanmagan.
Telekanal qayd etishicha, Mojtabo Xomanaiy Islom inqilobi qo‘riqchilari korpusi (IIQK) tomonidan qo‘llab-quvvatlanadigan nomzod sifatida tilga olinmoqda. Ammo mazkur da’volarga oid rasmiy bayonot yoki hujjatlar e’lon qilinmagani aytilmoqda.
Manbaga ko‘ra, IIQK AQSH bilan har qanday murosalarga qarshi chiqadi. Shuningdek, mazkur tuzilma “g‘alabagacha urush” kabi keskin pozitsiyani ma’qul ko‘rishi haqida ham ta’kidlar keltirilgan.
Ayni paytda, Eron rasmiy idoralari mazkur xabar yuzasidan ochiq munosabat bildirgani haqida ma’lumot yo‘q. Shu sababli, tarqalayotgan axborot mustaqil tarzda tekshirilgan va tasdiqlangan ma’lumot sifatida qaralmayapti.
“Zamin”ni Telegramʻda oʻqing!
