AQSH Markaziy qo'mondonligi (CENTCOM) Eron tinch aholisi uchun shoshilinch xavfsizlik ogohlantirishini e'lon qildi. Rasmiy bayonotga ko'ra, Eron hukumati Dizful, Isfahon va Sheroz kabi aholi zich joylashgan shaharlardan dronlar hamda ballistik raketalarni uchirish uchun foydalanmoqda. Ushbu harakatlar tinch aholi hayotini jiddiy xavf ostiga qo'ymoqda. Bu haqda tengrinews.kz xabar beradi.
CENTCOM vakillarining ta'kidlashicha, harbiy maqsadlarda foydalanilayotgan hududlar xalqaro huquqqa muvofiq o'z himoya maqomini yo'qotadi va qonuniy harbiy nishonga aylanishi mumkin. Shu sababli, AQSH harbiylari Eron fuqarolarini o'z uylarida qolishga va harbiy obektlar yaqinidan uzoqroq yurishga chaqirmoqda. Amerika tomoni o'z harakatlarida tinch aholiga zarar yetkazmaslik uchun barcha choralarni ko'rayotganini, biroq Eron rejimi tomonidan foydalanilayotgan hududlarda xavfsizlikni kafolatlay olmasligini ma'lum qildi.
Eron 2026 yil 28 fevraldan buyon yuzlab ballistik raketalar va minglab zarbdor dronlarni uchirgan. Biroq AQSH va uning hamkorlari Eronning harbiy salohiyatini zaiflashtirishi ortidan hujumlar sur'ati pasaygan. Shu bilan birga, 8 mart kuni Bahrayn, Quvayt va Birlashgan Arab Amirliklari Eron tomonidan fuqarolik infratuzilmalariga, jumladan, suv tozalash inshootlariga yangi hujumlar uyushtirilganini xabar qildi. Eron esa o'z navbatida AQSH aviazarbalari oqibatida Qeshm orolidagi suv ta'minoti tizimi shikastlanganini da'vo qilmoqda.
“Zamin”ni Telegramʻda oʻqing!
