AQSHning g‘arbiy hududida joylashgan mashhur Kolorado daryosining suv zaxiralari keskin kamayib bormoqda. Mutaxassislar vaziyat tobora jiddiy tus olayotganini ta’kidlamoqda. Bu haqda CBS News telekanali xabar tarqatdi.
Ma’lum qilinishicha, AQSH g‘arbida yashovchi qariyb 40 million aholi har kuni aynan ushbu daryo suvidan foydalanadi. Aholi sonining ortishi esa manbadan yanada ko‘proq suv olinishiga sabab bo‘lmoqda. Shu bilan birga, tabiiy omillar suv zaxiralarini tiklashga yetarlicha yordam bermayapti.
Arizona shtati universiteti huzuridagi Kayl nomidagi suv siyosati markazi direktori Sara Porterning aytishicha, suv omborlaridagi sath pasayishiga bir nechta omil ta’sir qilmoqda.
Xususan, Kolorado daryosini suv bilan ta’minlaydigan Tog‘li qoyalardagi qor miqdori bu qishda rekord darajada past bo‘lgan. Bu esa Mid va Pauell ko‘llari kabi yirik suv omborlarida suv sathining kritik darajaga tushib ketishiga olib kelgan.
Maqolada qayd etilishicha, Arizona, Kaliforniya va Nevada shtatlari rasmiylari suvni tejash bo‘yicha kurash olib bormoqda. Biroq hozircha daryoni qurib qolishdan saqlab qoladigan yagona va samarali kelishuvga erishilmagan.
Mutaxassislar fikricha, yuzaga kelgan muammo qishloq xo‘jaligi, gidroenergetika hamda millionlab insonlarning suv ta’minotiga jiddiy xavf tug‘dirishi mumkin.
“Zamin”ni Telegramʻda oʻqing!
