Rossiya chegaralarida biometrik nazorat kuchaytirildi: 70 ming kishi kiritilmadi

Foto: Sergey Savostyanov

Rossiyada xorijliklarning biometrik ma’lumotlarini yig‘ish bo‘yicha tajriba boshlanganidan buyon 70 mingga yaqin xorij fuqarosining mamlakatga kirishiga ruxsat berilmagan.

Rossiya IIV ma’lumotlariga ko‘ra, shu davr mobaynida chegara nazoratidan o‘tish jarayonida jami 14 million kishi biometrik ma’lumotlarini topshirgan.

Rossiyaga kirishda ikki turdagi ma’lumot olinadi

Mazkur amaliyot 2024 yil 1 dekabrdan boshlab qo‘llanilayotgan bo‘lib, xorijliklar mamlakatga kirish vaqtida ikki asosiy biometrik parametr bo‘yicha identifikatsiya qilinadi:

• shaxsning fotosurati;

• barmoq izlari.

Ma’lumotlar chegara nazorati punktlarida olinadi va elektron tizimda tekshiriladi.

«Tizim nafaqat biometrik ma’lumotlarni yig‘ishga, balki kirish taqiqlanganidan so‘ng mamlakatni tark etib, shaxsiy ma’lumotlarini o‘zgartirgan va Rossiyaga qayta kirishga uringanlarni aniqlashga ham yordam beradi», — deya ma’lum qildi Rossiya IIV matbuot xizmati.

Tizim qaysi punktlarda ishlayapti?

Tajribaning dastlabki bosqichida Moskvadagi Sheremetevo, Domodedovo va Jukovskiy aeroportlari, shuningdek, Orenburg viloyatidagi Mashtakovo avtomobil nazorat-o‘tkazish punkti tizimga ulangan.

2025 yil 1 maydan Vnukovo aeroporti ham ro‘yxatga qo‘shildi.

2026 yilda yana 11 ta punkt qo‘shildi

2026 yil iyun oyida biometrik ma’lumotlarni yig‘ish tizimi yana bir qator hududlarda joriy etildi.

Jumladan, Sankt-Peterburg, Novosibirsk, Krasnoyarsk va Yekaterinburg shaharlarida, shuningdek, Oltoy o‘lkasi hamda Irkutsk, Kurgan, Novosibirsk, Saratov, Orenburg va Omsk viloyatlaridagi yana 11 ta nazorat-o‘tkazish punkti ushbu tizim bilan jihozlandi.

Shu tariqa, Rossiya chegaralarida xorijliklarni identifikatsiya qilish jarayoni bosqichma-bosqich raqamlashtirilib, biometrik nazorat qamrovi kengaytirilmoqda.