Biolog ispan shilliqqurtiga qarshi kurashda nima yordam bera olishini aytdi

Hosilga jiddiy zarar yetkazadigan ispan shilliqqurtining tabiiy dushmanlaridan biri — qorin oyoqli mollyuskalar guruhiga kiruvchi leopard shilliqqurti. Bu haqda biolog Dmitriy Safonov RIA Novostiga ma’lum qildi.

Mutaxassisning ta’kidlashicha, leopard shilliqqurtlari aprel–may oylarida qishki uyqudan chiqib, ko‘payish va o‘sish davrini boshlaydi. Yozda havo issiq va quruq bo‘lganda ularning faolligi pasayadi. Taxminan avgust oyidan esa asosiy faollik davri boshlanib, ob-havoga qarab oktyabrgacha davom etishi mumkin.

«Leopard shilliqqurti, avvalo, yirtqich hisoblanadi. U ispan shilliqqurtlarining o‘zini ham, tuxumlarini ham yeydi. Shuning uchun agar tomorqada leopard shilliqqurtlari bo‘lsa, ular siz uchun eng yaxshi tabiiy ittifoqchi», — dedi Safonov.

Biologning fikricha, leopard shilliqqurtlaridan maxsus ravishda xalos bo‘lish shart emas. Tomorqada umumiy sanitariya qoidalariga rioya qilish va ularning sonini nazorat qilishning o‘zi yetarli.

Mutaxassis ispan shilliqqurtining quyuq va yopishqoq shilimi tufayli ko‘plab hasharotxo‘r qushlar uni yeyishdan qochishini ham qayd etdi. Ayrim sutemizuvchilar uni iste’mol qilishga urinishi mumkin, ammo og‘zi shilliq modda bilan qoplanib qolgani uchun keyin yana yeyishni istamaydi.

«Tipratikan uni yeyishi mumkin. Ammo ikkinchi marta uni aniq yemaydi, chunki tipratikanning og‘iz bo‘shlig‘i yopishqoq shilliq modda bilan to‘lib qoladi. Uni tozalash uchun taxminan 30 daqiqadan bir soatgacha vaqt kerak bo‘ladi», — dedi u.

Shilliqqurtlarning boshqa tabiiy dushmanlari qatoriga baqalar, qurbaqalar, suv ilonlari, shuningdek, turli parazitlar va mikroskopik chuvalchanglar — nematodalar ham kiradi.