2026 yilning birinchi choragida O‘zbekistonda neft, tabiiy gaz va ko‘mir qazib olish hajmida pasayish kuzatildi. Bu haqda Milliy statistika qo‘mitasi ma’lumot berdi.
Qayd etilishicha, yanvar–mart oylarida tabiiy gaz qazib olish hajmi 9,6 milliard kub metrni tashkil etgan. Bu ko‘rsatkich o‘tgan yilning shu davriga nisbatan 15 foizga kamaygan.
Neft ishlab chiqarish hajmi 157,3 ming tonnaga yetgan bo‘lib, 2,2 foizlik pasayish qayd etilgan. Gaz kondensati ishlab chiqarish ham 18,3 foizga qisqarib, 242,3 ming tonnani tashkil qilgan. 2024 yil bilan taqqoslanganda ham pasayish yuqori darajada ekani aytilmoqda.
Shu bilan birga, ayrim yo‘nalishlarda ijobiy o‘sishlar kuzatilgan. Avtomobil benzini ishlab chiqarish 2,9 foizga oshib, 313,2 ming tonnaga yetgan. Yoqilg‘i mahsulotlari ishlab chiqarish esa 54,3 foizga o‘sib, 280,9 ming tonnani tashkil etgan.
Elektr energiyasi ishlab chiqarish hajmi 4,7 foizga ko‘payib, 22,93 milliard kVt/soatga yetgan. Portlandsement ishlab chiqarish ham o‘sish qayd etib, 4,1 million tonnaga chiqqan.
“Zamin”ni Telegramʻda oʻqing!
