Build Markets kredit aktivlarini boshqarish kompaniyasi investitsiya direktori Matt Dinesning fikricha, Bitcoin xazinasiga ega kompaniyaning STRC (Variable Rate Series A Perpetual Stretch Preferred Stock) kabi abadiy imtiyozli aksiyalariga sarmoya kiritayotgan investorlar katta xavfni e’tiborsiz qoldirmoqda. Bunday qimmatli qog‘ozlar emitentlari asosiy sarmoyani qaytarib berish majburiyatiga ega emas va shartlarni qayta ko‘rib chiqmasdan, cheksiz muddat dividend to‘lashi mumkin. Bu haqda Cointelegraph.com xabar beradi.
Dinesning ta’kidlashicha, agar investorlar o‘z mablag‘larini qaytarib olmoqchi bo‘lsa, ular ikkilamchi bozorda aksiyalarni sotishga majbur. Muddat tugash sanasi belgilanmaganligi sababli, bunday aktivlar likvidlik tanqisligi va foiz stavkalari o‘zgarishi bilan bog‘liq doimiy xavflarga duch keladi.
STRC aksiyalariga bo‘lgan talab ortib bormoqda: payshanba kuni uning kunlik savdo hajmi 1,5 milliard dollarga yetib, rekord o‘rnatdi. Kompaniya ushbu vosita orqali Bitcoin xaridlarini moliyalashtirishda davom etmoqda. Delphi Digital ma’lumotlariga ko‘ra, STRC uchun ruxsat etilgan emissiya chegarasi 28 milliard dollarni tashkil etadi va agar bu limit oshirilmasa, kompaniyaning BTC to‘plash sur’ati sekinlashishi mumkin.
Hozirgi vaqtda muomaladagi STRC aksiyalarining umumiy nominal qiymati 8,5 milliard dollarni, bozor qiymati esa qariyb 8,4 milliard dollarni tashkil etadi. Aksiya narxi 99 dollar atrofida bo‘lib, yillik dividend stavkasi 11,5 foizni tashkil qiladi. Dividend stavkasi o‘zgaruvchan bo‘lib, har oyda qayta ko‘rib chiqiladi.
“Zamin”ni Telegramʻda oʻqing!
