Gemini kriptovalyuta birjasi Elon Musk boshqaruvidagi SpaceXAI bilan hamkorlikda oʻzining bashorat bozorlari platformasi uchun sunʼiy intellektga asoslangan yangi funksiyani ishga tushirdi. Ushbu yangilik foydalanuvchilarga shaxsiylashtirilgan tasmalar yaratish imkonini beradi. Kompaniyaning payshanba kungi bayonotiga koʻra, “Command Center” deb nomlangan ushbu yechim foydalanuvchining ochiq pozitsiyalari va kuzatuv roʻyxatlari asosida kripto, sport, xomashyo, siyosat, iqtisodiyot va madaniyatga oid bozorlarni koʻrsatadi. Bu haqda Cointelegraph.com xabar beradi.
“Command Center” foydalanuvchining bashoratlar tarixini oʻrganib, keyingi qadamlar uchun eng muhim maʼlumotlarni taqdim etadi. Mazkur vosita SpaceXAI tomonidan ishlab chiqilgan Grok modeli asosida ishlaydi. Gemini kripto bozoridagi savdo hajmi va foydaning kamayishi fonida anʼanaviy savdodan tashqari bashorat bozorlari va sunʼiy intellekt yoʻnalishlariga kengayib borayotgan bir necha birjalardan biri hisoblanadi.
Oʻtgan oyda Gemini foydalanuvchilarga ChatGPT va Claude kabi modellarni oʻz savdo hisoblariga ulash imkoniyatini yaratgan edi. Bu foydalanuvchilar nomidan bozorlarni avtonom kuzatish va hatto savdolarni amalga oshirish imkonini beradi. Hozirda Gemini bashorat bozorlari platformasi Kalshi va Polymarket kabi yetakchilardan ortda qolayotgan boʻlsa-da, kompaniya choraklik daromadini 42 foizga oshirib, 50,3 million dollarga yetkazishga muvaffaq boʻldi.
Kompaniya oʻzining sof zararini oʻtgan yilga nisbatan 27 foizga qisqartirib, 109 million dollargacha tushirdi. Gemini oʻzini shunchaki kripto birjasi emas, balki keng qamrovli moliyaviy xizmatlar koʻrsatuvchi kompaniya sifatida namoyon etishda davom etmoqda.
“Zamin”ni Telegramʻda oʻqing!
