Toshkentda navbatdagi feyk mojaroni uyushtirgan blogerlar jazolandi

Toshkent shahar IIBB matbuot xizmati navbatdagi feyk mojaro boʻyicha axborot berdi.

Ma'lum boʻlishicha, Shayxontohur tumanidagi bogʻlardan birida tasvirga olingan videorolik ijtimoiy tarmoqlarda keng tarqalgan. Unda 1997 va 2005 yilda tugʻilgan erkak va ayol ommaviy joyda mojaroni sahnalashtirib, huquqbuzarlik sodir etgani tasvirlangan. Ushbu videoni odamlarning e'tiborini tortish va obunachilarni koʻpaytirish maqsadida maxsus uyushtirilgani aniqlangan.

Mazkur holat boʻyicha blogerlarga nisbatan Oʻzbekiston Respublikasi Ma'muriy javobgarlik toʻgʻrisidagi kodeksining “Mayda bezorilik” moddasi asosida ma'muriy bayonnoma tuzildi. Ish Shayxontohur tuman jinoyat ishlari boʻyicha sudiga yuborildi.

Eslatib oʻtamiz, avvalroq Jizzax viloyatida erkak jonli ilonni yeyib, oʻz qilmishidan qattiq afsuslangani haqida xabar berilgan edi.