Xorazmda sisternani tozalayotgan yigit halok bo‘ldi

27 mart kuni Xorazm viloyati Shovot tumanida yosh yigit benzin sisternasini tozalayotgan paytda halok bo‘ldi, deb Nova24.uz xabar berdi.

Hodisa tumandagi yoqilg‘i quyish shoxobchalaridan birida sodir bo‘lgan. Zapravka xodimi tanishidan 10 tonnalik sisternaning ichki qismini tozalashni so‘ragan. Ish haqi keyinroq to‘lanishini aytgan. Shundan so‘ng fuqaro o‘g‘li (2004 yilda tug‘ilgan) bilan birga AYoQShga yo‘l olgan.

Tozalash paytida 19 yoshli yigit sisterna ichiga tushadi. Ammo ish jarayonida benzin qoldiqlaridan chiqqan bug‘lardan zaharlanib, hushidan ketadi. Buni ko‘rgan otasi uni qutqarish uchun pastga tushadi, biroq o‘zi ham hushini yo‘qota boshlaydi.

Shunda erkakning ukasi yordamga yetib kelib, uni kiyimidan tortib olib chiqadi. Afsuski, yosh yigitni qutqarib qolishning iloji bo‘lmaydi va u vafot etadi.

Ma’lum bo‘lishicha, erkak va uning o‘g‘li avval ham shu AYoQShdagi rezervuarlarni to‘rt marta tozalagan va har gal uchun 100-150 ming so‘m olgan. “Zamin” yangiliklarini “Telegram”da kuzatib boring