Toshkentda xavfli ichimliklar savdosi to‘xtatildi

Toshkent shahri Bektemir tumanida nomaʼlum sharoitda tayyorlangan salqin ichimliklar savdosi aniqlanib, to‘xtatildi, deb UPL.uz xabar berdi.

Yozning issiq kunlari bilan birga gavjum yo‘l yoqalarida fuqarolar tomonidan tayyorlangan, sanitariya talablariga javob bermaydigan ichimliklar savdosi faollashdi.

Toshkent shahar Sanitariya-epidemiologiya nazorati qo‘mitasining Bektemir tuman bo‘limi mutaxassislari tomonidan o‘tkazilgan navbatdagi tekshiruvda fuqarolar salomatligiga tahdid soluvchi mahsulotlar aniqlandi.

Tekshiruv davomida quyidagi mahsulotlar musodara qilindi:
• 10 litr ayran
• 5 litr limonad
• 8 litr o‘rik sharbati
• 9 litr tarkibi nomaʼlum ichimlik

Mazkur ichimliklar sanitariya me’yorlariga rioya qilinmagan holda, sifati va xavfsizligi kafolatlanmagan sharoitda tayyorlangan bo‘lib, belgilangan tartibda musodara qilinib, yo‘q qilindi.

Ichimliklar sotuvchilariga ogohlantirish berildi hamda aholi orasida oziq-ovqat zaharlanishining oldini olish bo‘yicha amaldagi sanitariya qoidalari haqida tushuntirishlar o‘tkazildi. “Zamin”ni Telegramʻda oʻqing!