Toshkentda taksichi qizga zo‘ravonlik qildi

Toshkentda qizga taksi haydovchisi tomonidan zo‘ravonlik qilindi, deb UPL.uz xabar berdi.
Ijtimoiy tarmoqlarda Toshkentda sodir bo‘lgan zo‘ravonlik holati haqida xabar tarqaldi. Facebook’dagi yirik guruhlarda e’lon qilingan ma’lumotlarga ko‘ra, taksi haydovchisi qizga tajovuz qilgan.

Jabrlanuvchining so‘zlariga ko‘ra, uning ish joyida “eshikdan eshikgacha” tarifida yetkazib berish xizmati buyurtma qilingan. Haydovchi esa ofisga chiqishni rad etib, mijozning o‘zi chiqishini talab qilgan.

Ofisdan chiqqan xodima buyurtmaning to‘lanmaganini bilmagan va yonida pul bo‘lmagan. Jabrlanuvchi haydovchiga ofisga kirib, pulni olib ketishni taklif qilgan. Bunga javoban haydovchi uning qo‘llaridan ushlab, uni silkita boshlagan, so‘ng qo‘llarini burab, posilkani tortib olgan.

Qiz ushbu hodisa yuzasidan rasmiy ariza yozgan. Yandex.Taxi matbuot xizmati bu holatga munosabat bildirdi:

“Biz holatdan xabardormiz, agressiv xatti-harakatlarga mutlaqo yo‘l qo‘yilmaydi. Kur’er xizmatdan chetlatildi. Ichki tekshiruv olib boryapmiz va huquqni muhofaza qiluvchi organlarga rasmiy so‘rov asosida barcha ma’lumotlarni taqdim etishga tayyormiz”, – deyiladi bayonotda. “Zamin”ni Telegramʻda oʻqing!