Samarqanddan yo‘lovchi sifatida yo‘lga chiqqan ikki yosh yigit butun mamlakat bo‘ylab muhokamaga sabab bo‘ladigan voqeaga qo‘l urdi. Ular nafaqat mashina o‘g‘irlab qo‘ydi, balki o‘z yo‘liga to‘sqinlik qilgan ichki ishlar xodimini pichoqlab, boshqa transport vositasini ham olib qochdi.
Hodisa 2025 yil 2 avgust kuni sodir bo‘lgan. Andijon viloyati Xo‘jaobod tumanida istiqomat qiluvchi 18 yoshli F.Sh. va F.X. ismli yigitlar Samarqanddan Namanganga yetib olish maqsadida yo‘lovchi sifatida Cobalt'ga o‘tirishadi. Sirdaryo viloyati hududida haydovchi hojatxonaga tushganidan foydalanib, ular mashinani olib qochadi.
Oradan ko‘p o‘tmay, Sirdaryo viloyati IIB 102 xizmatiga ushbu o‘g‘irlik haqida xabar tushadi. Barcha postlar va YPX inspektorlari ogohlantiriladi. Ammo yigitlar davlat raqamini yechib, izlarini yo‘qotishga harakat qiladi.
Bo‘ka blok-postida YPX inspektori Cobalt'ni to‘xtatadi, biroq haydovchi hujjatlarni ko‘rsatgandan so‘ng, ikkinchi yo‘lakdan mashinani haydab, hech kim kutmagan tomonga yo‘l oladi.
Eng yomoni esa shundaki, Bo‘ka tumani IIB jinoyat qidiruv bo‘limi xodimi N.Sh. yigitlarni to‘xtatishga urinayotgan paytda, ulardan biri uning bo‘yniga pichoq bilan hujum qiladi. Shundan so‘ng, Cobalt'ni qoldirib, xodimning Matiz'ini haydab ketishadi.
Bu bilan ham cheklanishmaydi — Toshkent viloyatining Ohangaron tumanida YPX inspektori X.D. ularni to‘xtatmoqchi bo‘ladi. Lekin yigitlar unga ham bo‘ysunmay, mashinani unga haydab yuborishadi. Inspektor jarohat olib, shifoxonaga yotqiziladi.
Tezkor surishtiruv ishlari samarasida gumonlanuvchilar Ohangaron shahri hududida qo‘lga olinadi.
Hozirda ularga nisbatan Jinoyat kodeksining 267-moddasi — transport vositasini o‘g‘irlash va boshqa qo‘shimcha moddalar bo‘yicha ish qo‘zg‘atilgan. Qonunga ko‘ra, bunday jinoyat uchun 5 yildan 20 yilgacha ozodlikdan mahrum qilish jazosi belgilangan.
Ushbu voqea jamoatchilikni hushyor bo‘lishga, xavfsizlikka jiddiy yondashishga chorlamoqda. Chunki bu faqat mashina o‘g‘irlash emas, balki hayot uchun xavf soluvchi jasoratsizlikning namunasidir.
“Zamin”ni Telegramʻda oʻqing!
