12 avgust kuni Samarqand viloyatining Urgut tumanida yirik yo‘l-transport hodisasi qayd etildi. Viloyat Yo‘l harakati xavfsizligi boshqarmasi ma’lumotlariga ko‘ra, “Mergancha” mahallasi hududida MAZ va MAN rusumli yuk mashinalari to‘qnashgan va har ikki transport vositasi ag‘darilib ketgan.
Tezkor ma’lumotlarga qaraganda, voqea soat 10:20 atrofida sodir bo‘lgan. MAZ haydovchisi ichki yo‘ldan “Kamangaron – Mergancha” yo‘nalishida harakatlanayotgan paytda oldinda kelayotgan MAN rusumli yuk mashinasining orqa qismiga kelib urilgan. Ayni paytda tergovchilar dastlabki versiya sifatida yuk mashinalaridan birining tormozi ishlamay qolganini bildirishmoqda.
Avariya oqibatida haydovchilardan biri shifoxonaga olib ketilgan, biroq rasmiy ma’lumotlarga ko‘ra, hech kim jiddiy tan jarohati olmagan. YHXB hodisa yuzasidan dastlabki surishtiruv ishlarini boshlab yuborgan.
Mahalliy fuqarolar aytishicha, to‘qnashuv joyi yo‘l harakati zich bo‘ladigan hudud hisoblanadi va bunday vaziyatlar ehtiyotsizlik hamda texnik nosozliklardan kelib chiqishi mumkin. Mutasaddilar esa yuk mashina haydovchilarini tezlikka rioya qilish, transport vositalari texnik holatini doimiy tekshirib turish va uzoq yo‘l oldidan maxsus profilaktik ko‘rikdan o‘tkazish zarurligi haqida yana bir bor ogohlantirmoqda.
“Zamin”ni Telegramʻda oʻqing!
