O‘zbekistonda qonunga xilof ravishda qimor va bukmekerlik xizmatlarini targ‘ib qilgan ikki bloger ma’muriy javobgarlikka tortilib, ularning ishi sudga oshirildi. Bu haqda Raqobatni rivojlantirish va iste’molchilar huquqlarini himoya qilish qo‘mitasi ma’lum qildi.
Tekshiruv natijalariga ko‘ra, bir necha yuz minglab obunachiga ega blogerlar o‘z sahifalarida bukmekerlik xizmatlarini targ‘ib qiluvchi postlar va videoroliklar joylashtirgan. Xususan, “Melbet” brendi ishtirokidagi kontent hamda qimor o‘yinlarini targ‘ib qiluvchi sahna ko‘rinishlari fuqaro Amirxon O‘tkir o‘g‘li Shamsiddinov (amirxon_uzbek) va Doniyor Ma’ruf o‘g‘li Ilyosovga (donik_krash) tegishli ekani aniqlangan.
Ma’muriy ish yuzasidan hujjatlar belgilangan tartibda rasmiylashtirilib, sudga yuborildi.
Ma’lumot uchun, “Reklama to‘g‘risida”gi qonunning 46-moddasiga muvofiq, O‘zbekistonda qimor va tavakkalchilikka asoslangan o‘yinlarni reklama qilish qat’iyan taqiqlanadi. Bunday faoliyat uchun ma’muriy yoki jinoiy javobgarlik belgilangan. Mutasaddilar bu kabi holatlar internet muhitida nazoratni yanada kuchaytirish zarurligini ta’kidlashdi.
“Zamin”ni Telegramʻda oʻqing!
