Yangihayotdagi ishlab chiqarish sexida yong‘in chiqdi

Bugun, 4 noyabr kuni Toshkent shahrining Yangihayot tumanidagi ishlab chiqarish sexida yong‘in kelib chiqdi, deb xabar berdi shahar Favqulodda vaziyatlar boshqarmasi.

Ma’lumotlarga ko‘ra, soat 11:58 da 112 xizmatiga Binokor qo‘rg‘onidagi Sholikor ko‘chasida joylashgan penoplast ishlab chiqarish sexida yong‘in boshlangani haqida murojaat tushgan.

Favqulodda vaziyatlar xizmatlari xabarni olgach, 10 daqiqa ichida — soat 12:08 da — voqea joyiga yetib borgan. Hozirda yong‘inni o‘chirish ishlari davom etmoqda.

Rasmiy ma’lumotga ko‘ra, hozircha jabrlanuvchilar yoki tan jarohati olganlar to‘g‘risida ma’lumot kelib tushmagan. Vazirlik qo‘shimcha ma’lumotlarni keyinroq taqdim etishini ma’lum qildi.

Kamola Shuhratova

«ZAMIN.UZ» muharriri