Joriy yilning oktyabr oyida Sirdaryo viloyati Xovos tumanida joylashgan bog‘dorchilik xo‘jaligiga tegishli dala maydonidan polietilen qoplar o‘g‘irlangani yuzasidan Ichki ishlar bo‘limiga murojaat kelib tushdi. Mazkur murojaat asosida IIB Tezkor-qidiruv bo‘limining podpolkovnik va mayor unvonidagi ikki nafar katta xodimi tekshiruv boshlagan.
O‘g‘irlikda gumon qilingan to‘rt nafar fuqaro majburan IIBga olib borilib, qamab yuborish bilan qo‘rqitilgan. Tergovni to‘xtatish, ya’ni ishni “bosdi-bosdi” qilish evaziga ulardan dastlab 55 million so‘m so‘ralgan. Bu haqda Davlat xavfsizlik xizmati rasmiy ma’lumot berdi.
Oradan ko‘p o‘tmay, tergovchilarning o‘zi “zararni qoplash” bahonasida 24 million so‘mni oladi. Keyinchalik esa, jinoyat ishi ochmaslik, hibsga olish chorasi qo‘llamaslik va hujjatlarni faqat ma’muriy javobgarlik doirasida rasmiylashtirib, sudga yuborish evaziga qo‘shimcha 11 million so‘m talab qilishadi.
DXXning Sirdaryo viloyati boshqarmasi, prokuratura hamda IIV Shaxsiy xavfsizlik bo‘limi hamkorligida o‘tkazilgan tezkor tadbirda ushbu katta tezkor xodimlar poraning 11 million so‘mini olayotgan paytda ushlangan. Ular qo‘lga olingan va Jinoyat kodeksining 210-moddasi 2-qismi "v" va "g" bandlari bilan ish qo‘zg‘atilgan.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
