Bugun, 6 dekabr kuni Buxoro viloyatining Kogon tumanida fojeali hodisa ro‘y berdi. Tog‘-kon sanoati korxonalari uchun portlovchi moddalar tayyorlanadigan “Shahms LTD”ga qarashli sexda kuchli portlash sodir bo‘lib, afsuski 4 nafar ishchi halok bo‘ldi. Bu haqda Favqulodda vaziyatlar vazirligi rasman ma’lum qildi.
Rasmiylarga ko‘ra, portlash soat 09:40 atrofida “Mustaqillik” MFY hududida joylashgan ishlab chiqarish maydonida yuz bergan. “Shahms LTD” 2019 yildan buyon Markaziy Osiyo va O‘zbekistondagi yangi konlar uchun portlovchi moddalar yetkazib berish bilan shug‘ullanib kelgan yirik korxona hisoblanadi.
Portlashdan keyin yong‘in tezda avj olgan, ammo Buxoro FVBning 7 ta qutqaruv bo‘linmasi tomonidan yong‘in soat 10:27da to‘liq o‘chirilgan. Hodisa paytida omborda 30 nafar xodim bo‘lgan, shulardan to‘rt ishchi voqea joyida halok bo‘lgani ma’lum qilindi. Yana 4 kishi yengil jarohatlar bilan shifoxonaga olib ketilgan, ularning ikkitasiga ambulator yordam ko‘rsatilib, uyiga javob berilgan.
Prezident Shavkat Mirziyoyev topshirig‘i bilan hukumat komissiyasi tuzildi. Unga Sanoat xavfsizligi qo‘mitasi rahbari Abduvaqqos Rafiqov boshchilik qiladi. Komissiyaning vazifalari — jabrlanuvchilarga tezkor yordam ko‘rsatish, portlash oqibatlarini bartaraf etish va bu fojea sabablarini atroflicha o‘rganish. Shu bilan birga, kelgusida bunday noxush hodisalarning oldini olish uchun aniq taklif va choralar ishlab chiqiladi.
Hozirda hudud to‘liq nazoratga olingan va zararni bartaraf etish ishlari davom etmoqda. Mutasaddilar vaziyatni qat’iy nazoratda saqlayotganini ma’lum qilmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
