Bemorlar orqali ehson yig‘gan firibgar qo‘lga olindi

Toshkent viloyatida bemorlar nomidan soxta akkauntlar ochib, ehson pullarini o‘zlashtirib kelgan fuqaro fosh etildi. Qonunbuzarlik Jizzax viloyati IIB xodimlari tomonidan aniqlanib, gumonlanuvchi qo‘lga olindi.

Ma’lum bo‘lishicha, Toshkent viloyati Bo‘ka tumanida yashovchi, 1999 yilda tug‘ilgan D.R. 2025 yil sentyabr oyidan boshlab Telegram messenjeri orqali bir nechta soxta akkauntlar ochgan. U turli ijtimoiy guruhlarda avval og‘ir kasallikka chalinib, go‘yoki sog‘ayib ketgan shaxslar nomidan tarqatilgan rasm va videolarga o‘zining bank plastik karta raqamlarini ilova qilgan.

Shu yo‘l bilan u odamlarning ishonchidan foydalanib, ehson sifatida yuborilgan mablag‘larni to‘plab, ularni shaxsiy ehtiyojlariga sarflab yuborgan. Ushbu firibgarlik holati Jizzax shahridagi “Zargarlik” mahallasida yashovchi fuqaroning huquqni muhofaza qiluvchi organlarga qilgan murojaati orqali ochiqlangan.

Hozirda mazkur holat yuzasidan Jinoyat kodeksining tegishli moddalari asosida jinoyat ishi qo‘zg‘atilib, dastlabki tergov harakatlari olib borilmoqda.

Ayni shu kabi holatlar mamlakatning boshqa hududlarida ham kuzatilgan. Jumladan, Buxoro viloyatida Telegram orqali nufuzli tashkilot rahbari nomidan soxta akkaunt ochib, korxona va muassasa rahbarlariga “xizmat topshirig‘i” mazmunida xabarlar yuborgan shaxs aniqlangan. Hatto tashkilot rahbarlaridan biri firibgarga ishonib, uning kartasiga 8 million so‘m pul o‘tkazib bergan.

Shuningdek, ayrim holatlarda xorijda vafot etgan o‘zbekistonliklarni vatanga qaytarish bahonasida pul yig‘ilayotgani haqida ham fuqarolar ogohlantirilgan. Ma’lumki, O‘zbekiston fuqarosi chet elda vafot etgan taqdirda, uning jasadi tegishli jamg‘armalar mablag‘lari hisobidan yurtga olib kelinadi.

Mutaxassislar fuqarolarni bunday holatlarda hushyor bo‘lishga, shubhali xabar va ehson so‘rovlariga ishonmaslikka chaqirmoqda. Hushyorlik — firibgarlikka qarshi eng kuchli qalqondir.