Toshkent shahrida qarzini soxta AQSh dollarlari bilan “yopib qo‘yish”ga uringan shaxs qo‘lga olindi. Bu haqda Iqtisodiy jinoyatlarga qarshi kurashish departamenti rasmiy ma’lumot berdi.
Ma’lum bo‘lishicha, muqaddam sudlangan R.T. tanishi M.X.ning ishonchini qozonib, unga 4 tonna pomidor yetkazib berishni va’da qilgan. Shu kelishuv asosida M.X. unga 4 ming dollar bergan. Biroq gumonlanuvchi ushbu mablag‘ni mahsulotga emas, shaxsiy ehtiyojlariga sarflab yuborgani aytiladi.
Keyinchalik pulni qaytarmaslik va vaziyatdan “yo‘l topish” maqsadida R.T. 100 dollarlik qalbaki kupyuralardan jami 4 ming dollar tayyorlab, qarzni shu tarzda to‘lashga harakat qilgan. Biroq soxta pullarni topshirish jarayonidayoq holat fosh etilib, gumonlanuvchi ashyoviy dalillar bilan ushlandi.
Holat yuzasidan Jinoyat kodeksining firibgarlik hamda qalbaki pul va qimmatli qog‘ozlarni tayyorlash va muomalaga kiritishga oid moddalari asosida jinoyat ishi qo‘zg‘atildi. Ayni paytda tergov harakatlari davom etmoqda.
“Zamin”ni Telegramʻda oʻqing!
