Toshkent viloyatida qimmatbaho metallarning noqonuniy aylanmasiga qarshi yirik tezkor chora-tadbirlar o‘tkazildi. Davlat xavfsizlik xizmati viloyat boshqarmasi hamda viloyat Ichki ishlar bosh boshqarmasi hamkorligida tashkil etilgan amaliyotning asosiy maqsadi — kriminogen vaziyatni barqarorlashtirish va qimmatbaho metallar savdosi bilan bog‘liq jinoiy guruhlar faoliyatiga chek qo‘yish bo‘lgan.
Ma’lum qilinishicha, Ohangaron tumani, Angren va Olmaliq shaharlarida o‘tkazilgan tezkor-qidiruv tadbirlari doirasida 9 nafar fuqaroning yashash manzili ko‘zdan kechirilgan. Natijada tarkibida qimmatbaho metall bor deb gumon qilingan jami 17,5 tonna qum va toshlar, shuningdek, ularni qayta ishlashda ishlatilgan turli asbob-uskunalar topilib, belgilangan tartibda rasmiylashtirib olingan.
Tekshiruvlar jarayonida qo‘shimcha ravishda 135 gramm oltin, 25 gramm “marixuana”, 1 dona ov quroli va 42 dona o‘q-dori ham musodara qilingani aytilmoqda. Barcha ashyoviy dalillar tegishli ekspertizalarga yuborilgan.
Ayni paytda holat yuzasidan tergovga qadar tekshiruv ishlari davom etmoqda. Yakunda qonunchilik doirasida tegishli huquqiy baho berilishi ma’lum qilindi.
“Zamin”ni Telegramʻda oʻqing!
