11 mart kuni AQSHdan O‘zbekistonga maxsus aviareys bilan 72 nafar yurtdoshimiz olib kelindi. Bu haqda Amerika Qo‘shma Shtatlarining O‘zbekistondagi diplomatik vakolatxonasi xabar tarqatdi.
Rasmiy ma’lumotda aytilishicha, ushbu fuqarolar AQSH hududida qonuniy asosda yashash huquqiga ega bo‘lmagani uchun mamlakatdan chiqarilgan. Ularni yurtiga qaytarish ishlari maxsus tashkil etilgan reys orqali amalga oshirilgan.
Elchixona qayd etishicha, mazkur tadbir AQSH tomonidan noqonuniy migratsiyaga qarshi ko‘rilayotgan choralar doirasidagi navbatdagi amaliy qadamlardan biri hisoblanadi. Shu orqali migratsiya qoidalarini buzgan shaxslarni aniqlash va ularni mamlakatdan chiqarish siyosati izchil davom ettirilayotgani bildirilgan.
Shuningdek, bayonotda Donald Tramp prezidentlik lavozimiga kirishganidan buyon 1000 nafardan ziyod O‘zbekiston fuqarosi AQSHdan deportatsiya qilingani ham keltirilgan. Bu raqam so‘nggi davrda migratsiya qonunchiligiga nisbatan talablar yanada kuchaytirilganini ko‘rsatadi.
Bayonot yakunida AQSH hududiga noqonuniy ravishda kirgan yoki mamlakatda qonuniy maqomsiz yashab turgan shaxslar qamoq jazosi hamda majburiy chiqarib yuborilish kabi oqibatlarga duch kelishi mumkinligi eslatilgan. Shu bilan birga, deportatsiya jarayonlarida hamkorlik ko‘rsatgani uchun O‘zbekiston hukumatiga alohida minnatdorlik izhor etilgan.
“Zamin”ni Telegramʻda oʻqing!
