Shavkat Mirziyoyev nomiga Donald Tramp tomonidan rasmiy maktub yo‘llandi. Bu haqda davlat rahbari matbuot xizmati ma’lum qildi. Mazkur maktub ikki davlat o‘rtasidagi diplomatik muloqot va hamkorlik aloqalarining yanada faollashayotganidan dalolat beradi.
Amerika Qo‘shma Shtatlari yetakchisi o‘z murojaatida O‘zbekiston prezidentining 2026 yil fevral oyida bo‘lib o‘tgan Tinchlik kengashining ilk yig‘ilishidagi ishtirokini yuqori baholab, uning xalqaro maydondagi faol pozitsiyasini alohida ta’kidladi.
Maktubda, shuningdek, O‘zbekistonda amalga oshirilayotgan islohotlar va qo‘lga kiritilayotgan salmoqli natijalar e’tirof etildi. Donald Tramp mamlakatga tashrif buyurish taklifi uchun samimiy minnatdorlik bildirgani ham qayd etildi.
O‘z navbatida, AQSH rahbari O‘zbekiston yetakchisini Tinchlik kengashining navbatdagi yig‘ilishiga, shuningdek G20 sammiti doirasida Mayami shahrida bo‘lib o‘tadigan nufuzli anjumanga taklif qildi. Bu takliflar ikki davlat o‘rtasidagi siyosiy va iqtisodiy hamkorlikni yanada mustahkamlashga xizmat qilishi kutilmoqda.
Maktub yakunida iliq va samimiy tilaklar bildirilib, “Yaratgan Sizni va O‘zbekistonning buyuk xalqini asrasin”, degan mazmundagi so‘zlar o‘rin olgani diplomatik munosabatlardagi ijobiy muhitni yanada namoyon etdi.
Ma’lum qilinishicha, Tinchlik kengashining navbatdagi yig‘ini 2027 yil boshlarida o‘tkazilishi rejalashtirilgan bo‘lsa, G20 sammiti 2026 yil dekabr oyida bo‘lib o‘tishi kutilmoqda. Bu kabi xalqaro uchrashuvlar O‘zbekistonning global siyosiy jarayonlardagi ishtirokini yanada kuchaytirishi mumkin.
“Zamin”ni Telegramʻda oʻqing!
