Maktabgacha va maktab taʼlimi vaziri Eʼzoza Karimova tizimda faoliyat yuritayotgan barcha taʼlim muassasalari xodimlariga rasmiy murojaat bilan chiqdi. Unda pedagoglardan bolalarning huquq va qonuniy manfaatlarini hurmat qilish, ularning ruhiy holatiga ehtiyotkorlik bilan yondashish ustuvor vazifa ekani alohida taʼkidlandi.
Murojaatda qayd etilishicha, har bir o‘qituvchi va tarbiyachi uchun bolalarni asrash, ularga nisbatan ehtiromli munosabatda bo‘lish hamda sog‘lom psixologik muhitni taʼminlash asosiy kasbiy tamoyilga aylanishi shart.
Vazir pedagogik jamoalarni har qanday noo‘rin harakatlar, beparvolik yoki masʼuliyatsizlik holatlarining oldini olishga chaqirar ekan, kasbiy etika meʼyorlariga qatʼiy rioya qilish va yuqori madaniyat ko‘rsatish zarurligini urg‘uladi.
Shuningdek, taʼlim muassasalarida barqaror, ijobiy va insonparvar muhit yaratish, bolalarning huquq va manfaatlarini ishonchli himoya qilish har bir xodimning asosiy burchi ekani taʼkidlandi.
“Har qanday vaziyatda amaldagi qonunchilik, ichki tartib-qoidalar va kasbiy etika talablariga to‘liq amal qilinishi shart. Bu borada loqaydlikka mutlaqo yo‘l qo‘yilmaydi. Har bir xodim o‘z faoliyati natijalari uchun shaxsan javobgar ekanini chuqur anglashi lozim. Rahbar sifatida sizlardan doimiy hushyorlik, yuksak masʼuliyat va fidoyilikni kutaman”, — deyiladi vazir murojaatida.
Mazkur chaqiriq taʼlim tizimida intizom, masʼuliyat va bolalarga bo‘lgan eʼtiborni yana-da kuchaytirishga qaratilgani bilan ahamiyatli.
“Zamin”ni Telegramʻda oʻqing!
