Shifokor nazoratisiz osma ukol fojiaga aylandi: Namanganda 39 yoshli ayolning vafoti
Namanqanda 39 yoshli ayolning osma ukol olish jarayonida vafot etishi fojiali hodisa bo'lib, bu holat yangi qurg'on tumanidagi oilaviy shifokorlik punktida sodir bo'lgan. Marhuma avval davlat tomonidan berilgan qon ko'paytiruvchi dorilarni qabul qilgan va 28 martda yana shifokor yordamiga murojaat qilgan. Biroq, moliyaviy qiyinchiliklar sababli, u nazoratsiz dori olishni so'ragan va natijada ahvoli yomonlashgan. Hozirda hodisa bo'yicha tergov harakatlari olib borilmoqda.
Namangan viloyatida achinarli voqea yuz berdi — osma ukol olish jarayoni 39 yoshli ayolning oʻlimi bilan yakunlandi. Hodisa Yangiqoʻrgʻon tumanidagi oilaviy shifokorlik punktida sodir boʻlgani maʼlum qilindi.
Rasmiy maʼlumotlarga koʻra, marhuma avval davlat tomonidan bepul taqdim etilgan qon koʻpaytiruvchi dorilarni qabul qilib kelgan. U hodisadan bir necha kun oldin “Neofer” preparati kursini tugatgan. Biroq 28 mart kuni yana tibbiyot muassasasiga murojaat qilib, tanasida ogʻriq borligini aytgan va uyida saqlab kelgan “Ferlek” dorisini qoʻshimcha ravishda qoʻllashni iltimos qilgan.
Hamshiraning aytishicha, u bemorga dorini faqat shifokor nazoratida olish kerakligini tushuntirgan. Ammo ayol moliyaviy qiyinchiliklarni vaj qilib, yana shu joyda ukol qoʻyib berishni soʻragan. Oqibatda hamshira uning iltimosiga koʻnib, dori vositasini ulab bergan.
Afsuski, muolajadan soʻng bemor ahvoli keskin yomonlashgan va uni saqlab qolishning iloji boʻlmagan. Yaqinlari esa ayol sogʻlom holda tibbiyot muassasasiga borganini taʼkidlab, voqeadan jiddiy xavotir bildirmoqda.
Shuningdek, mazkur tibbiyot punktida sharoitlar talab darajasida emasligi ham aytilmoqda. Guvohlar soʻzlariga koʻra, muassasada hatto oddiy tibbiy jihozlar yetishmagan, hodisa kuni esa shifokor boʻlmagan.
Holat yuzasidan hamshiraga nisbatan Jinoyat kodeksining tegishli moddasi bilan jinoyat ishi qoʻzgʻatildi. Ayni paytda tergov harakatlari olib borilmoqda va ish prokuratura nazoratiga olingan.
Izohlar 0
…