Jizzax viloyatida selfi olish istagi yana bir ko‘ngilsiz hodisaga sabab bo‘ldi. Maktab o‘quvchisi poyezd vagoni ustiga chiqib, suratga tushmoqchi bo‘lgan paytda kuchli elektr toki zarbasiga uchradi.
Ma’lum bo‘lishicha, voqea 24 aprel kuni G‘allaorol tumanidagi Marjonbuloq temir yo‘l bekatida sodir bo‘lgan. Bekatda turgan yuk vagoni ustiga chiqqan 7-sinf o‘quvchisi aynan shu paytda yuqori kuchlanishli elektr toki ta’siriga tushgan.
Rasmiy ma’lumotlarga ko‘ra, jabrlanuvchi 2012 yilda tug‘ilgan voyaga yetmagan bola bo‘lib, u zudlik bilan tuman tibbiyot muassasasiga olib borilgan. Hozirda u jonlantirish bo‘limida davolanmoqda.
Shifokorlar xulosasiga ko‘ra, bolada tana yuzasining 35–40 foizini qamrab olgan ikkinchi va uchinchi darajali og‘ir kuyish jarohatlari aniqlangan.
Hodisa yuzasidan viloyat transportda xavfsizlikni ta’minlash boshqarmasi tomonidan tekshiruv ishlari olib borilmoqda.
Afsuski, so‘nggi vaqtlarda bunday holatlar ko‘payib bormoqda. Avvalroq Chirchiq shahrida 17 yoshli yigit ham vagon ustida tok urishi oqibatida og‘ir ahvolga tushgani xabar qilingan edi. Shuningdek, 27 aprel kuni yana ikki nafar voyaga yetmagan o‘quvchi ham shunday xavfli holatga duch kelgan.
Mutaxassislar temir yo‘l hududlarida, ayniqsa, yuqori kuchlanishli tarmoqlar yaqinida ehtiyotkor bo‘lish, bunday xavfli harakatlardan tiyilish zarurligini ta’kidlamoqda.
