Ochilish marosimida jurnalist nega yig‘ladi?

O‘zbekiston Respublikasi Prezidenti Shavkat Mirziyoyev Abdulla Qodiriy nomidagi ijod maktabi va muzeyni borib ko‘rdi.
Mazkur maktab o‘zbek tili va adabiyotini, badiiy ijod sirlarini chuqur o‘rganishga ixtisoslashgan.

Prezident bu yerda yaratilgan sharoitlar bilan tanishdi, o‘qituvchi va o‘quvchilar bilan suhbatlashdi.

Qodiriy yashab, ijod qilgan hovli uy-muzeyga aylantirildi. Abdulla Qodiriy nomidagi madaniyat va istirohat bog‘iga kiraverishda adib muzeyi barpo etildi. Mazkur binoga “Turon” kutubxonasi ham joylashtirildi. Bu nafaqat adibning vorislari, balki adabiyot, ma’naviyat va ma’rifat ahlini, butun xalqimizni cheksiz quvontirdi.

Yozuvchi va shoirlar, adabiyotshunos olimlar, yosh ijodkorlar bilan suhbatda davlatimiz rahbari Eski shaharda Abdulla Qodiriy nomidagi ijod maktabi, adib muzeyi va kutubxona qurilgani ushbu go‘shaga yana baraka qaytayotganidan dalolat ekanini qayd etdi.
*****
Abdulla Qodiriyning xotirasiga bunday yuksak e’tibor yurtdoshlarimizning xursandchiligiga sabab bo‘ldi. Shu bilan birga ayrim ziyolilar ijtimoiy tarmoqlardagi sahifalarida o‘z kechinmalari bilan o‘rtoqlashdi. Quyida ularning ayrimlarini e’tiboringizga havola etamiz.
****
Hozirgina Abdulla Qodiriy bog‘ida "Turon" kutubxonasida Prezidentning adiblar bilan uchrashuvini o‘qib qoldim.
Attang, Do‘rmonda yotib bexabar qolibman, aks holda, albatta borar edim...
...Lekin baribir boraman, ko‘rganimni esse qilib yozaman. "Agar qatag‘on bo‘lmaganda biz bugun boshqa O‘zbekistonda yashagan bo‘lar edik" degan so‘z turtki berdi.

*****
«Jasorat bitgan edi, til kesilgan edi...»
Qodiriyning bu so‘zlari afsuski doim dolzarb. Ayni damda Qodiriy uyining ochilish marosimidaman.
Yig‘layapman...
Kecha uy-muzeyi masalasida intervyu berishga vaqt ajratishni istamagan Sirojiddin Saidning ma’ruza o‘qishini ko‘rib yig‘layapman... Ularga muzey qilishni so‘rab qancha xat yozib kutilmadi.

30 yildan beri Muzey masalasini cho‘zib yurgan, amalga oshirishga shoshilmagan Xayriddin Sultonovning tantanavor ma’ruza o‘qishini ko‘rib yig‘layapman...
Abdulla Qodiriyga pul yo‘q, deb xat bergan Kamila Akilovaning gerdayib turishini ko‘rib yig‘layapman...
Afsuski, bugungi tantanada Pahlavon Sodiq, Asliddin Suyunov ishtirok etishmayapti...


Tahririyatdan: ushbu xayrli marosimda qatnashish uchun ma’nan haqi bor, ammo mutasaddilar taklif etmagan ziyolilar orasida millatparvar yozuvchi Nabijon Boqiy ham bor. Vaholanki, u Abdulla Qodiriyning KGB (hozirgi DXX) arxivida saqlanayotgan “delo”sini yillab titkilab, “Qatlnoma” degan hujjatli qissa yozganini bugun hamma ham bilavermaydi. Chunki mazkur asar qariyb 25 yildan beri qayta nashr etilmayotir... “Zamin”ni Telegramʻda oʻqing!