Taniqli xonanda Guli Asalxo‘jayeva “Omon-omon” dasturiga mehmon sifatida taklif etilib, o‘z oilaviy hayoti haqida qiziqarli xotiralari bilan o‘rtoqlashdi. San’atkor suhbat davomida o‘g‘li Jahongirning kelajagi haqidagi orzulari, o‘zi san’at yo‘liga qanday kirib kelgani hamda kelin tanlashda nimalarga e’tibor bergani haqida batafsil so‘zlab berdi.
“O‘g‘limning diplomat bo‘lishini orzu qilganman”
Xonandaning aytishicha, har bir kasbning o‘ziga xos mashaqqatlari bo‘ladi. Uning o‘g‘li Jahongir maktab yillarida ham bilimga chanqoq, darslarda faol o‘quvchilardan biri bo‘lgan. Shu sababli ona sifatida u o‘g‘lini kelajakda diplomat bo‘lishini orzu qilgan va ko‘p marta shu yo‘lni tanlashini aytgan. Biroq Jahongir onasiga “Sizning ko‘nglingiz uchun diplomat bo‘lishim mumkin, ammo keyin afsuslanib qolaman”, deb javob bergan. Shu so‘zlarni eshitganidan keyin xonanda o‘g‘lining o‘z istagi va qiziqishiga hurmat bilan qarashga qaror qilgan.
Guli Asalxo‘jayeva o‘z hayotidan ham bir misol keltirdi. Uning so‘zlariga ko‘ra, yoshlik davrida san’at sohasiga qiziqishi bo‘lgan. Opasi san’at yo‘nalishida oliy ta’lim olgani uchun uni ham boshqa sohada o‘qitish maqsadida institutga olib borgan. U yerda imtihonlardan muvaffaqiyatli o‘tgan bo‘lsa-da, otasining roziligi bo‘lmagani sabab o‘qishni davom ettira olmagan. Bu holat uning qalbida ma’lum bir armon sifatida saqlanib qolgan.
Shuning uchun ham turmush qurganidan keyin uning hayotida yangi imkoniyat paydo bo‘lgan. Turmush o‘rtog‘i qo‘llab-quvvatlashi bilan u san’at oliygohida tahsil olish imkoniga ega bo‘lgan. Ana shu tajriba unga bolalarini erkin qaror qabul qilishga o‘rgatish kerakligini anglatgan. Shu sababli u farzandlariga o‘zlari yoqtirgan kasbni tanlashga ruxsat berishni ma’qul ko‘rgan.
“Kelinimning ko‘ngli toza, ayyorlik yo‘q”
Suhbat davomida xonanda kelin tanlash masalasi haqida ham fikr bildirdi. Uning aytishicha, ilgari intervyularda undan o‘g‘illari san’atkor qizga uylansa qanday munosabat bildirishi haqida ko‘p so‘rashgan. Xonanda bu savol haqida ancha o‘ylanganini tan oldi. Chunki san’at sohasida ishlaydigan inson ham uy ishlariga vaqt ajrata oladimi, degan o‘ylar bo‘lgan. O‘zi esa uyda oddiy ayollar kabi hayot kechirishini aytdi: ovqat tayyorlaydi, uy ishlarini bajaradi, hatto hovlini ham supuradi.
Kelin tanlashda u eng avvalo qizning onasi bilan suhbatlashishga ahamiyat berishini ta’kidladi. Chunki, uning fikricha, qiz bola ko‘p jihatdan onasiga o‘xshaydi. Jahongir Asal ismli qiz bilan turmush qurishni aytganida ham xonanda avvalo uning onasi bilan gaplashib ko‘rgan. Qizning onasi juda samimiy va yaxshi inson ekanini ko‘rgach, bu nikohga rozilik bergan.
Xonandaning ta’kidlashicha, kelini ham u kutganidek tarbiyali va mehribon inson bo‘lib chiqqan. Uy ishlarida ham faol, taom tayyorlashni ham biladi. Eng muhimi esa, uning qalbi pok va samimiy. Guli Asalxo‘jayeva hozirda uch nafar kelinga ega ekanini aytib, ularning barchasini o‘z qizlaridek ko‘rishini bildirdi. San’atkor kelinlariga baxt va totuvlik tilab, oiladagi mehr-oqibat eng katta boylik ekanini ta’kidladi.
