Oʻzbekistonda qarzdorlar uchun majburiyatlar reyestri joriy etiladi

Oliy Majlis Qonunchilik palatasi 7-yanvar kuni oʻtkazilgan yigʻilishda Oʻzbekistonda qarzdorlar uchun majburiyatlar reyestrini joriy etish boʻyicha qonun loyihasini birinchi oʻqishda ma'qulladi. Ushbu reyestrda sud yoki boshqa organlar hujjatlari asosida oʻz majburiyatlarini bajara olmayotgan qarzdorlar haqidagi ma'lumotlar boʻladi.

Amaldagi qonunchilikka koʻra, agar qarzdorning mol-mulki yoki daromadi undirish uchun etarli boʻlmasa, ijro ishi yakunlangan deb hisoblanadi va cheklovlar bekor qilinadi. Yangi qonun loyihasi esa, qarzdorning majburiyatlarini toʻliq bajarishiga qadar cheklovlarni kuchda qoldirishni nazarda tutadi.

Reyestr Majburiy ijro byurosi tomonidan yuritiladi va unga qarzdorning mol-mulkka ega emasligi yoki mablagʻlari yoʻqligi haqidagi ma'lumotlar kiritiladi. Shuningdek, reyestrga kiritilgan qarzdorlar uchun soliq qarziga penya undirilmasligi Soliq kodeksida koʻzda tutilgan.

Barcha cheklovlar, masalan, mol-mulkni xatlash, chet elga chiqishni taqiqlash yoki hisobvaraqlarni bloklash, qarzdor oʻz majburiyatlarini toʻliq bajarmagunga qadar oʻz kuchida qoladi. Agar keyinchalik qarzdorning mablagʻlari yoki mol-mulki aniqlansa, majburiy ijro harakatlari qayta tiklanadi.

Qonunga koʻra, qarzdor reyestrdan faqat quyidagi holatlarda chiqariladi: qarzdor majburiyatlarini toʻliq bajarganda, vafot etganda, sud hujjati haqiqiy emas deb topilganda yoki 10 yil davomida qarzdorning mol-mulki aniqlanmasa. Shuningdek, qarzdor bankrot deb e'lon qilinganda reyestrdan chiqariladi.

Qonun loyihasi birinchi oʻqishda qabul qilindi, oldinda ikkinchi va uchinchi oʻqish jarayonlari bor. Deputatlardan 138 nafari loyihani qoʻllab ovoz berdi, 2 nafari betaraf qoldi. “Zamin” yangiliklarini “Telegram”da kuzatib boring