Toshkentda yirik ma'lumotlarni qayta ishlash markazi tashkil etiladi

^{Foto: Prezident matbuot xizmati.}
Oʻzbekiston Respublikasi Prezidenti Shavkat Mirziyoyev 14 yanvar kuni Abu-Dabi shahriga tashrifning ishbilarmonlik tadbirlari doirasida Birlashgan Arab Amirliklari sun'iy intellekt vaziri Umar bin Sulton al-Olama bilan uchrashuv oʻtkazdi.

Uchrashuvda “Presight” kompaniyasi rahbari Tomas Pramotedam, “AIQ” kompaniyasi rahbari Magjan Kenesbay va “Khazna” kompaniyasi rahbari Hasan al-Naqbi, Muhammad bin Zoid nomidagi Sun'iy intellekt universiteti prezidenti Erik Sing ham ishtirok etdi.

“Presight”, “AIQ” va “Khazna” kompaniyalari katta ma'lumotlar tahlili va sun'iy intellekt sohasida etakchi kompaniyalar qatoriga kiradi. Muhammad bin Zoid universiteti sun'iy intellekt sohasidagi tadqiqotlarga ixtisoslashgan dunyodagi birinchi oliy ta'lim muassasasi hisoblanadi.

Uchrashuvda Amirlik kompaniyalari bilan ilgʻor texnologiyalarni rivojlantirish va ularni turli sohalarga muvaffaqiyatli joriy etishga qaratilgan strategik sheriklikni kengaytirish yoʻllari koʻrib chiqildi.

^{Foto: Prezident matbuot xizmati}
Generativ sun'iy intellektni ishlab chiqish, shu jumladan energetika sohasida "katta til modellari"ni qoʻllash, Toshkentda yirik ma'lumotlarni qayta ishlash markazini tashkil etish boʻyicha hamkorlikni kengaytirish boʻyicha kelishuvlarga erishildi.

Muhammad bin Zoid nomidagi Sun'iy intellekt universiteti bilan almashinuvlarni faollashtirishga alohida e'tibor qaratildi. Prezidentimiz talabalarni oʻqitish dasturini ishga tushirib, bu sohada yuqori malakali kadrlar tayyorlash boʻyicha "yoʻl xaritasi"ni qabul qilishni taklif etdi.

Ilmiy-tadqiqot laboratoriyalarini birgalikda ishga tushirish, texnologik klasterlar tashkil etish va kontaktsiz toʻlov operatsiyalari uchun innovatsion echimlarni joriy etish rejalari muhokama qilindi. “Zamin” yangiliklarini “Telegram”da kuzatib boring