O‘zbekistonda zargarlarga yangi soliq imtiyozlari berildi

Prezident Shavkat Mirziyoyev zargarlik sohasini qo‘llab-quvvatlashga qaratilgan yangi qonunni imzoladi, deb xabar berdi "UzDaily.uz".

Qonunga ko‘ra, 2024-yil 1-sentabrdan 2027-yil 1-sentabrgacha “Hunarmand” uyushmasi a’zolari uchun amal qilayotgan soliq imtiyozlari, “O‘zbekzargarsanoati” uyushmasi a’zosi bo‘lgan yakka tartibdagi zargar tadbirkorlarga ham tatbiq etiladi.

Shuningdek, ushbu uyushmaga mansub korxonalar ishlab chiqarishda foydalanilayotgan bino va yer maydonlari bo‘yicha mol-mulk solig‘i hamda yer solig‘idan ozod qilinadi.

“Qimmatbaho metallar va toshlar to‘g‘risida”gi qonunga kiritilgan o‘zgarishlarga muvofiq, affinaj korxonalariga quyidagi huquqlar qo‘shimcha ruxsatlarsiz beriladi:
• Zargarlik mahsulotlari ishlab chiqaruvchilarga qulay hajm va shakllarda qimmatbaho metallarni sotish;
• Qimmatbaho metallar asosida suvenir tangalar tayyorlash va sotish.

Shuningdek, zargar ishlab chiqaruvchilar o‘zlarining yarim tayyor mahsulotlarini boshqa ishlab chiqaruvchilarga sotish huquqiga ega bo‘ladi. Narxni ular o‘zlari belgilaydi, biroq bu narx London metall birjasi va Markaziy bank kursidan past bo‘lmasligi kerak. “Zamin”ni Telegramʻda oʻqing!