O‘zbekiston Ukrainadagi 1110 fuqarosi bo‘yicha tekshiruv o‘tkazadi

Ukrainada Rossiya armiyasi safida urushgan 1110 nafar o‘zbekistonlik haqida ma’lumotlar tekshiriladi, deb Nova24.uz xabar berdi.

“Xo‘chu jit” nomli ukrain loyihasi bu fuqarolar Rossiya armiyasi bilan shartnoma tuzib, Ukrainadagi urushda qatnashganini bildirgan. O‘zbekiston Tashqi ishlar vazirligi ushbu xabar yuzasidan tekshiruv boshlanganini ma’lum qildi.

Agar ishtirok tasdiqlansa, ushbu fuqarolar O‘zbekistonga qaytganida jinoiy javobgarlikka tortiladi. Jinoyat kodeksining 154-moddasi (“Yollanma jangchi”) bo‘yicha 10 yilgacha ozodlikdan mahrum qilish jazosi belgilanadi.

Bundan tashqari, ayrim fuqarolarda Rossiya fuqaroligi mavjudligi ham qayd etilgan. MIB eslatishicha, O‘zbekistonda ikki fuqarolik taqiqlangan va bu holatda ham tegishli choralar ko‘riladi.

Vazirlik o‘zbekistonliklarga xorijda har qanday harbiy harakatlarda qatnashish qat’iyan taqiqlanganini yana bir bor eslatdi. “Zamin”ni Telegramʻda oʻqing!