Samarqandda Rim nomi berilgan ko‘cha paydo bo‘ldi

O‘zbekiston va Italiya o‘rtasidagi yuqori darajadagi muzokaralar yakunlari doirasida Samarqanddagi Xalqaro kongress markazida tantanali marosim bo‘lib o‘tdi, deb UPL.uz xabar berdi. Unda shahardagi ko‘chalardan biriga Italiya poytaxti — Rim nomi berildi.

Bu qaror ikki mamlakat o‘rtasidagi madaniy va strategik aloqalar mustahkamlanayotganini ta’kidlaydi. Prezident Shavkat Mirziyoyev ushbu muhim voqeani sharhlar ekan, bu qaror O‘zbekiston va Italiya o‘rtasidagi ko‘p asrlik tarixiy va madaniy aloqalarni hisobga olgan holda qabul qilinganini qayd etdi.

Shuningdek, mazkur nom berish ikki davlat o‘rtasidagi yuqori darajadagi strategik hamkorlik munosabatlarini ifodalaydi. Samarqanddagi ko‘chalardan biriga Rim nomi berilishi O‘zbekiston va Italiya xalqlari o‘rtasidagi do‘stlik va o‘zaro hurmat ramzi hisoblanadi.

Samarqand — qadimgi sivilizatsiyalar chorrahasi va Buyuk ipak yo‘lining muhim nuqtalaridan biri sifatida — endi G‘arb sivilizatsiyasining timsoli bo‘lmish Rim bilan yanada yaqinroq bog‘lanadi. Bu ko‘cha nomi o‘zaro anglashuv va hamkorlikni mustahkamlashda yangi ko‘prikka aylanishi kutilmoqda.

Marosim O‘zbekiston va Italiya o‘rtasidagi hamkorlikni har tomonlama kengaytirishga bo‘lgan intilish va o‘zaro qiziqishning yorqin dalili bo‘ldi.