Naqd pulga uy olish taqiqlanishi mumkin

O‘zbekistonda naqd pulda yirik xaridlar qilish cheklanishi mumkin, deb Uz24.uz xabar berdi. Bu haqda Soliq qo‘mitasi raisining birinchi o‘rinbosari Mubin Mirzayev ma’lum qildi. Uning so‘zlariga ko‘ra, yashirin iqtisodiyotga qarshi kurashish maqsadida prezident qarori loyihasi ishlab chiqilgan bo‘lib, unda naqdsiz hisob-kitoblarni rag‘batlantirish ko‘zda tutilgan.

Ushbu tizim bosqichma-bosqich joriy etiladi:

. Katta summadagi xaridlar — jumladan, uy-joy va avtomobil savdolari — bosqichma-bosqich faqat naqdsiz shaklda amalga oshirilishi rejalashtirilmoqda.

. Birinchi navbatda ko‘chmas mulk savdolarini naqd pulsiz shaklga o‘tkazish ko‘zda tutilgan.

Mubin Mirzayevning ta’kidlashicha, hozirda uy sotish va sotib olish jarayonlari asosan naqd pul yoki to‘lov xizmatlari orqali amalga oshirilmoqda. Yangi loyiha esa bu jarayonni qonuniy tarzda, bank aylanmasi orqali amalga oshirish va tegishli rag‘batlantirish mexanizmlarini joriy etishni nazarda tutadi.

Aslida, bu boradagi rejalar o‘tgan yilning bahoridayoq ma’lum qilingan edi — ya’ni uy-joy, ko‘chmas mulk va avtomobil bitimlarini faqat bank orqali amalga oshirish taklif etilgan. “Zamin”ni Telegramʻda oʻqing!