O‘zbekiston elchixonasi tashabbusi bilan Qashqadaryo viloyatidagi “Agro Gold Premium” kompaniyasi rahbari Shavkat Sultonov va Misrning EFC Plants Tissue Culture S.A.E. kompaniyasi bosh direktori Lubna Salem o‘rtasida onlayn muzokaralar o‘tkazildi. Ushbu uchrashuvning asosiy maqsadi – kartoshka urug‘ini yetkazib berish bo‘yicha hamkorlikni rivojlantirish va qishloq xo‘jaligi sohasida yangi imkoniyatlar ochishdir.
Suhbat davomida, Misr tomonidan O‘zbekistonga sara urug‘lik kartoshka yetkazib berish bilan bog‘liq turli masalalar muhokama qilindi. O‘zbek tomonidan ma’lumot berilganida, dastlabki bosqichda kartoshka urug‘ini ekish uchun maxsus himoyalangan yer maydoni tayyorlangani va keyinchalik ekin maydonlarining hajmini oshirish rejalashtirilgani aytib o‘tildi. Bu qadamlar O‘zbekistonda kartoshka yetishtirishni yanada rivojlantirishga xizmat qiladi.
Misr vakillari o‘z navbatida, O‘zbekistonga yetarli miqdorda kartoshka urug‘ini yetkazib berishni tasdiqladi va kelgusida hamkorlikning yanada kuchaytirilishini kutishlarini bildirishdi.
Muloqot yakunida, Misr tomoni bilan joriy iyul oyi yakuniga qadar O‘zbekistonga 500 ming dona G0 avlodiga mansub CARA navli kartoshka urug‘ini bepul yuborishga kelishib olindi. Ushbu kartoshka urug‘lari, shu yilning o‘zida Qashqadaryoda ekilib, ko‘paytirilishi va mahalliy dehqonlar orasida tarqatilishi rejalashtirilgan.
Bu ish hamkorlikning yangi bosqichiga qadam qo‘yish, O‘zbekistonda kartoshka yetishtirish bo‘yicha yangi loyihalarni amalga oshirish va qishloq xo‘jaligi sohasida yangi imkoniyatlar yaratishga xizmat qiladi. Bundan tashqari, ushbu tashabbus dehqonlar uchun yangi mahsulotlarni yetishtirishdagi samaradorlikni oshirishga va mahalliy iqtisodiyotni rivojlantirishga ham katta ta’sir ko‘rsatadi.
Foto: Dunyo
