Yurtimizda oliy ta’limga kirish jarayonining muhim bosqichi — tanlov bosqichi yakunlandi. Endi abituriyentlar o‘zlari tanlagan yo‘nalishlarda nechanchi o‘rinda ekanini aniq bilish imkoniyatiga ega bo‘ladi. Bu jarayon imtihonning ikkinchi bosqichi tugaganidan bir necha kun o‘tib amalga oshiriladi.
Ma’lumotlarga ko‘ra, abituriyentlar tanlagan beshta yo‘nalish bo‘yicha o‘z o‘rnini ko‘rishi, shuningdek, boshqa nomzodlarning natijalari bilan ham tanishishi mumkin bo‘ladi. Bu orqali har bir talabgor o‘z imkoniyatlarini baholab, o‘qishga kirish ehtimolini oldindan hisoblab olishi mumkin.
Eslatib o‘tamiz, tanlov bosqichi kecha — 8 avgust kuni soat 23:59 da rasman yakunlandi. Belgilangan muddat tugagach, abituriyentlarga ta’lim yo‘nalishlarini o‘zgartirish yoki ma’lumot kiritish imkoniyati berilamaydi. Shu sababli, barcha qarorlar va tanlovlar belgilangan vaqtda amalga oshirildi.
Mutasaddilarning aytishicha, ushbu yangilik abituriyentlar uchun jarayonning ochiqligi va shaffofligini ta’minlaydi. Shu bilan birga, har bir yosh o‘z natijalarini boshqalarniki bilan taqqoslab, kelgusi qadamlarini rejalashtirish imkoniyatiga ega bo‘ladi.
“Zamin”ni Telegramʻda oʻqing!
