O‘zbekistonda gastronomik turizmni yangi bosqichga olib chiqishga qaratilgan raqamli loyiha yo‘lga qo‘yildi. Turizm qo‘mitasi matbuot xizmati ma’lum qilishicha, endilikda sayyohlar eaten.uz onlayn-platformasi orqali mahalliy aholi uylariga tashrif buyurib, milliy taomlardan tatib ko‘rishlari mumkin.
Yangi servis hozircha Samarqand shahri va Urgut tumanida ishga tushirilgan bo‘lib, undan foydalanuvchilar nafaqat taomlarning tayyorlanish jarayonida ishtirok etadi, balki to‘ylar yoki turli oilaviy bayramlar kabi milliy marosimlarda ham ishtirokchi bo‘lish imkoniga ega bo‘ladilar.
Platformada qulay izlash tizimi yo‘lga qo‘yilgan — sayyohlar o‘z qiziqishlari va manziliga qarab uy tanlay oladi. Shu tariqa, har bir mehmon mahalliy oilalar hayotiga yaqindan nazar tashlab, xalqning qadriyatlari, urf-odatlari va milliy oshxonasi bilan to‘liq tanishish imkoniyatiga ega bo‘ladi.
Loyihaning yana bir muhim jihati — u mahalliy aholi uchun qo‘shimcha daromad manbai yaratishni maqsad qilgan. Odatiy oilalar o‘z uylarini sayyohlar uchun ochish orqali turizm iqtisodiyotida to‘g‘ridan to‘g‘ri ishtirok etadi. Mutahassislar fikricha, bunday tashabbus mamlakatning madaniy va gastronomik salohiyatini xalqaro maydonda yanada keng yoritishga xizmat qiladi.
Shu bilan birga, eaten.uz O‘zbekistonning eng katta boyligi — uning odamlari, madaniyati va milliy taomlari orqali mamlakatni sayyohlarga yangicha talqinda namoyon qilishga qaratilgan. Kelgusida platforma hududlar bo‘ylab kengaytirilishi va gastroturizmni rivojlantirishda muhim qadam bo‘lishi kutilmoqda.
“Zamin”ni Telegramʻda oʻqing!
