TBC Bank guruhi OLX Uzbekistan onlayn e’lonlar servisining nazorat paketini sotib olish bo‘yicha kelishuvni e’lon qildi, deb Kursiv xabar berdi.
Bu xarid uchun TBC Bank xalqaro investorlar qo‘llab-quvvatlagan Titan Investments xoldingi bilan qo‘shma korxona tuzdi. Aksiyalar OLX Group’dan sotib olinadi, ushbu guruh Prosus tarkibiga kiradi.
Tuzilgan kelishuvga ko‘ra, TBC Bank 50% + 1 dona aksiya egasiga aylanadi, qolgan ulush Titan Investments’ga tegishli bo‘ladi. Hozirda shartnomani rasmiylashtirish uchun regulatorlar roziligi kutilyapti.
TBC Bank ma’lum qilishicha, Prosus bilan tuzilgan bitim bankka OLX UZ orqali yangi mijozlar segmentiga chiqish imkonini beradi. OLX Uzbekistan sayti mamlakatdagi eng ko‘p tashrif buyuriladigan 6-sayt hisoblanadi.
Ayni paytda OLX Uzbekistan’da oyiga 5,4 million faol foydalanuvchi va 2,2 million faol e’lon mavjud. OLX brendi O‘zbekistonda o‘z nomi bilan faoliyat yuritishda davom etadi.
TBC Bank servisni o‘z ekotizimiga integratsiya qilishni rejalashtirmoqda. Bu esa raqamli xizmatlar doirasini yanada kengaytirish imkonini beradi.
“Zamin”ni Telegramʻda oʻqing!
