NF Group ma’lumotlariga ko‘ra, O‘zbekiston yuqori sifatli ombor ko‘chmas mulki hajmi bo‘yicha MDH davlatlari orasida uchinchi o‘rinni egalladi, deb Kursiv.uz xabar berdi. 2025 yilning uchinchi choragida mamlakatda jami 555 ming kvadrat metr ombor maydoni qayd etilgan.
Reytingda Qozog‘iston (1,78 mln kv. m) va Belarus (1,72 mln kv. m) yetakchilik qilmoqda. O‘zbekiston esa kuchli uchlikka kirib, ombor infratuzilmasini rivojlantirayotgan davlatlar qatoriga qo‘shildi.
Mavjud omborlarning 56 foizi B sinfiga to‘g‘ri keladi. 53 foizi spekulyativ loyihalar bo‘lib, 20 foizi kompaniyalarning o‘z ehtiyojlari uchun, 15 foizi esa logistika (3PL) operatorlari ixtiyorida.
2024 yil 4-choragidan 2025 yil 3-choragigacha mamlakatda 160 ming kv. m yangi ombor maydonlari foydalanishga topshirildi. 2026 yil oxirigacha yana 370 ming kv. m ombor qurilishi rejalashtirilgan.
O‘zbekistonda bo‘sh ombor maydonlari darajasi juda past — atigi 1,7 foizni tashkil etadi. Ijara narxlari esa: A sinfidagi omborlar uchun o‘rtacha yillik $156 (taxminan 1,9 mln so‘m), B sinfi uchun esa $90 (taxminan 1,1 mln so‘m).
